वीरगंज । पर्सा निर्वाचन क्षेत्र नं. २ मा नेपाली कांग्रेसभित्र असन्तुष्टि बढ्दै जाँदा पार्टी परित्याग गर्नेहरूको संख्या वृद्धि भएको छ । फागुन २१ गते हुने प्रतिनिधिसभा सदस्य निर्वाचनको सन्दर्भमा कांग्रेसका उम्मेदवार तथा पूर्वमन्त्री अजय चौरसिया प्रति असन्तुष्टि जनाउँदै केही नेता तथा कार्यकर्ताले दलपरिवर्तन गरेको बताएका छन्।
आइतबार बहुदरमाई नगरपालिकाको डकैला बहुअरीमा आयोजित नेकपा (एमाले)को चुनावी सभा तथा पार्टी प्रवेश कार्यक्रममा कांग्रेसका पूर्व बुथ सभापति काशी यादव, स्थानिय नेता रामबालक यादव लगायत एक सयभन्दा बढी नेता तथा कार्यकर्ता एमालेमा प्रवेश गरेको जनाइएको छ।
यसअघि पर्सागढी नगरपालिकामा पनि कांग्रेस परित्याग गरी दुई दर्जनभन्दा बढी युवा राष्ट्रिय स्वतन्त्र पार्टी (रास्वपा)मा प्रवेश गरेका थिए । रास्वपाका अनुसार युवा समाजसेवी रविशंकर दास चौधरी, वडा नम्बर–९ का वडाध्यक्षका प्रत्यासी निरज चौधरी, भूतपूर्व प्रहरी रामाधारी यादव, समाजसेवी मीनबहादुर भण्डारी लगायतका व्यक्तिहरू रास्वपामा आबद्ध भएका छन्।
कांग्रेस परित्याग गर्नेहरूका अनुसार लामो समयदेखि एउटै व्यक्तिलाई अवसर दिँदा पनि क्षेत्रको अपेक्षित विकास हुन नसकेको गुनासो छ । “परिवर्तनका लागि जनस्तरमा आवाज उठिरहेको बेला पुरानै अनुहार दोहोरिनु असन्तुष्टिको कारण बनेको छ,” एक स्थानीयले बताए।
नाम नलेख्ने सर्तमा एक कांग्रेसी युवा नेताले भने, “यसपटकको निर्वाचनमा चौरसिया जीको जित त्यति सहज देखिँदैन । कांग्रेसभित्रै पनि थुप्रै असन्तुष्टि छन् । नेता–कार्यकर्तासँगै घुमे पनि भोट सुनिश्चित छैन ।” अर्का एक मतदाताले जनताको परिवर्तन चाहनाका कारण प्रतिस्पर्धा कडा हुने टिप्पणी गरे ।
स्थानीय राजनीतिक वृत्तमा कांग्रेसभित्रको असन्तुष्टि र मतदाताको परिवर्तन चाहनाले अन्य दललाई अवसर मिल्न सक्ने आकलन गरिएको छ । क्षेत्रबासीका अनुसार एमालेकी उम्मेदवार रिमा कुमारी यादव र रास्वपाका उम्मेदवार सुशील साह कानु प्रति आकर्षण देखिएको बताइन्छ ।
पर्सा–२ मा दलपरिवर्तन र चुनावी गतिविधि तीव्र भइरहेका बेला आगामी निर्वाचन परिणाममा यसको प्रभाव कस्तो पर्ला भन्ने चासो बढेको छ।
