वीरगंज । मधेश प्रदेशका मुख्यमन्त्री कृष्णा यादवले फागुन २१ गतेकाे निर्वाचनमा नेपाली कांग्रेसका उम्मेदवारलाई विजयी गराउन स्थानीय मतदातासँग अपिल गरेका छन् ।
पर्सा क्षेत्र नं. ४ अन्तर्गत छिपहरमाई गाउँपालिका वडा नं. १ मिर्जापुरमा पुगेका मुख्यमन्त्री यादवले कांग्रेसका स्थानीय नेता तथा कार्यकर्तासँग भेटघाट गर्दै कांग्रेसका उम्मेदवार रमेश रिजललाई जिताउन आग्रह गरेका हुन्।
नेपाली कांग्रेस मधेश प्रदेशका अध्यक्ष समेत रहेका मुख्यमन्त्री यादवले यसपालिकाको निर्वाचन मुलुकका लागि महत्वपूर्ण रहेको औंल्याउँदै कांग्रेसको जित आवश्यक रहेको बताए । उनले देशमा संकटको बेलामा कांग्रेसले निकास दिएको स्मरण गराउँदै अहिलेको चुनौतीको समाधानका लागि पनि कांग्रेसको विकल्प नभएको दाबी गरे ।
कांग्रेसका वडा सभापति पासपती गिरीको अध्यक्षतामा भएकाे भेटघाट कार्यक्रममा मधेश प्रदेशका वन तथा वातावरण मन्त्री शंकर चौधरी, कांग्रेस पर्साका सह सचिव नविन सिंह, रमेश पाण्डे, बलिष्टर अहमद, किशाेर जयसवाल, वडाध्यक्ष कामेश्वर प्रसाद यादव, पप्पु यादव, रुपेश उपाध्याय, सुरेन्द्र यादव लगायत स्थानिय नेता तथा कार्यकर्ताकाे उल्लेखनीय उपस्थिती रहेको थियो।
यसअघि मुख्यमन्त्री यादवले श्री नेरा प्राबी भलुवहिया, मिर्जापुर छठघाट र ओरिया नदीको टठबन्ध निर्माणका लागि स्थलगत अवलाेकन तथा निरीक्षणसमेत गरेका थिए। अवलाेकनकाे क्रममा मुख्यमन्त्री यादवले टठबन्ध निर्माण र मिर्जापुरमा छठघाट बनाउने प्रतिबद्धता व्यक्त गरेकाे नेपाली कांग्रेस नेता नविन सिंहले जानकारी दिए ।
