वीरगंज । पर्साका प्रमुख जिल्ला अधिकारी भोला दाहालद्वारा वीरगंजमा जारी गरिएको कर्फ्यू आदेशको चाैतर्फी आलोचना सुरु भएको छ। वीरगंज महानगरपालिका वडा नं. ११ श्रीपुरमा भएको घटनालाई लिएर अकास्मात् पुरै बजार क्षेत्रभरी कर्फ्यू आदेश जारी गरिएपछि स्थानीयस्तरमा असन्तुष्टि बढेको हो।
अहिले निर्वाचन र विवाहको लगनको समय भएकाले कर्फ्यू आदेश पालना गर्न गाह्रो हुने वीरगंजबासीको भनाइ छ। “एउटा वडामा भएको घटनालाई आधार बनाएर पुरै वीरगंज ठप्प पार्नु उचित होइन,” स्थानीयहरूको गुनासो छ । यस कदमले प्रशासन र सुरक्षा संयन्त्र असफल भएको आरोप समेत लगाइएको छ ।
समाजिक कार्यकर्ता जय साहले प्रमुख जिल्ला अधिकारी र सुरक्षा निकाय पूर्ण रूपमा असफल भएको टिप्पणी गरेका छन् । उनले सामाजिक सञ्जालमार्फत लेख्दै “एउटा वडामा भएको सानो विवाद नियन्त्रण गर्न नसक्ने असक्षमताको परिणाम स्वरूप सम्पूर्ण वीरगंजमा कर्फ्यू लगाइएको” बताएका छन् । वीरगंज मधेशको आर्थिक मेरुदण्ड भएको उल्लेख गर्दै उनले “शहर बन्द होइन, सुरक्षा व्यवस्था मजबुत बनाउने” माग अघि सारेका छन्।
यसैगरी, युवा महादेव कुर्मीले केही उच्छृङ्खल व्यक्तिका कारण पुरै वीरगंजलाई ‘बन्धक’ बनाउन नमिल्ने बताएका छन्। उनले अहिले हिन्दु समुदायमा बिहेको लगन चलिरहेको सन्दर्भ उल्लेख गर्दै कर्फ्यू कुनै हालतमा मान्य नहुने धारणा व्यक्त गरेका छन् ।
अर्का युवा कृष्णा कुमारले पनि सामाजिक सञ्जालमा कर्फ्यूको विरोध जनाउँदै केही व्यक्तिको गतिविधिका कारण पुरै शहर बन्द गर्नु गलत भएको टिप्पणी गरेका छन्। विवाहको लगनकै बेला कर्फ्यू लगाइनु नागरिकमैत्री कदम नभएको उनको भनाइ छ।
कतिपयले भने यसलाई निर्वाचन भाँड्ने षड्यन्त्रको रूपमा व्याख्या गरेका छन् । आइतबार साँझ वडा नं. ११ श्रीपुरमा दुई समुदायबीच झडप भएको थियो । झडपमा केही व्यक्ति घाइते भएका थिए भने केहीलाई प्रहरीले नियन्त्रणमा लिएर अनुसन्धान थालेको छ । तर सोमबार बिहान ९:४५ बजेदेखि लागू हुने गरी प्रमुख जिल्ला अधिकारीबाट कर्फ्यू आदेश जारी भएपछि स्थानीयहरू आक्रोशित बनेका हुन्।
यस विषयमा बुझ्न प्रमुख जिल्ला अधिकारी दाहालसँग फोनमार्फत सम्पर्क गर्न खोज्दा फोन नउठेका कारण प्रतिक्रिया लिन सकिएन।
