वीरगञ्ज । लगातारको वर्षाका कारण वीरगञ्ज महानगरपालिका–२६ स्थित अठराहा सुगौली क्षेत्र जलमग्न भएको छ। पानी निकासको उचित व्यवस्था नहुँदा बस्ती तथा सडकमा पानी जम्नुका साथै सयौँ बिघा खेतीयोग्य जमिनसमेत डुबानमा परेको स्थानीयले बताएका छन्।

डुबानका कारण स्थानीयको जनजीवन प्रभावित भएको छ भने आवतजावतमा समेत समस्या भएको छ। लामो समयदेखि पानी निकासको समस्या झेल्दै आएका स्थानीयवासीले तत्काल निकासको व्यवस्था गर्न माग गर्दै आज अलौस्थित एकीकृत भन्सार जाँच चौकी (आईसीपी) को गेटमा चक्काजाम गरेका छन्।

स्थानीयका अनुसार पानी निकासको उचित व्यवस्थापन नहुँदा वर्षायाममा हरेक वर्ष अठराहा सुगौली क्षेत्र डुबानमा पर्ने गरेको छ। यसपटक पनि लगातारको वर्षापछि ठूलो क्षेत्रफलमा पानी जम्दा खेतीपाती प्रभावित भएको छ भने बस्तीसमेत जोखिममा परेको छ।

समस्या समाधानका लागि सम्बन्धित निकायले तत्काल पानी निकासको व्यवस्था गर्नुपर्ने माग स्थानीयवासीले गरेका छन्। चक्काजामका कारण आईसीपी क्षेत्रमा सवारी आवागमनसमेत प्रभावित भएको छ।

वीरगंज । वीरगंज महानगरपालिकाले अनधिकृत रूपमा राखिएका ‘होर्डिङ बोर्ड’, ब्यानर तथा प्रचार सामग्री हटाउन सुरु गरेको छ । महानगरपालिकाले सार्वजनिक सम्पत्तिको संरक्षण, सडक तथा विद्युत् संरचनाको व्यवस्थापन र सहरको सौन्दर्य कायम गर्ने उद्देश्यअनुरुप सार्वजनिक विद्युत्का खम्बा तथा सार्वजनिक स्थानमा नियमविपरीत राखिएका अनधिकृत होर्डिङ बोर्ड, ब्यानर तथा प्रचार सामग्री आजदेखि हटाउन सुरु गरेको हो ।

महानगरपालिकाले सार्वजनिक पोल तथा स्थानमा विज्ञापन सामग्री राख्नुअघि महानगरपालिकाबाट आवश्यक अनुमति लिन आग्रह गर्दै वीरगञ्जका विभिन्न चोक तथा सडकका विद्युत् खम्बामा जथाभावी टाँगिएका निजी क्लिनिक, चिकित्सक तथा विभिन्न व्यवसायका प्रचार सामग्री हटाउने कामको थालनी गरिएको महानगरका हरियाली संयोजक प्रकाश खेतानले जानकारी दिनुभयो ।

महानगरपालिकाले सञ्चालन गरेको अभियानअन्तर्गत वीरगञ्जका मुख्य सडक, चोक तथा विद्युत्का खम्बामा अनुमति नलिई राखिएका प्रचार सामग्री हटाउने कार्य तीव्र पारिएको उहाँको भनाइ छ । उहाँले भन्नुभयो, “महानगरलाई स्वच्छ, सुन्दर र व्यवस्थित बनाउने दायित्व हामी सबैको हो, त्यसैले सार्वजनिक सम्पत्तिको दुरुपयोग गरेर सहरी सौन्दर्य बिगार्ने र अनुमतिविना विज्ञापन राख्ने छुट कसैलाई छैन ।”

महानगरपालिकाले कुनै पनि अनुमति नलिई सार्वजनिक स्थानमा होर्डिङ बोर्ड, ब्यानर तथा अन्य प्रचार सामग्री नराख्नसमेत सम्बन्धित व्यक्ति तथा संस्थालाई अनुरोध गरेको छ ।

अहिले सडक डिभिजन कार्यालय हेटौँडाले वीरगञ्जको मुख्य सडकलाई आगामी दसैँअघि पूर्ण रूपमा सफा र व्यवस्थित बनाइने उद्देश्यअनुरुप त्रिभुवन राजपथअन्तर्गत पर्ने गण्डक चोकदेखि मितेरीपुलसम्मको सडक २५–२५ मिटर दायाँ–बायाँ विस्तार गर्ने उद्देश्यअनुसार घरहरु भत्काउने काम सम्पन्न गरेको छ ।

रौतहट । अविरल वर्षापछि लालबकैया नदीमा आएको बाढीका कारण रौतहटको मौलापुर नगरपालिका–२ मर्यादपुरस्थित तटबन्धमा कटान तीव्र बनाएसँगै आसपासका बस्ती तथा भू–भाग प्रभावित भएको छ ।

सो नदीमा पानीको बहाव बढेसँगै तटबन्ध आसपासका क्षेत्रमा कटान भइरहेकाले तटबन्ध भत्की नदीको पानी बस्ती तथा खेतीयोग्य जमिनमा पस्नसक्ने जोखिम बढेको छ ।

यसैबीच, निरन्तरको वर्षासँगै आएको बाढीले स्थानीय जनजीवन प्रभावित भइरहेको अवस्थामा जिल्ला प्रशासन तथा स्थानीय जनप्रतिनिधि सम्मिलित टोलीले आजै जोखिम क्षेत्रको अवलोकन गरी बाढी प्रभावित स्थानीयलाई आश्वस्त रहन अनुरोध गरेको छ ।

रौतहटका प्रमुख जिल्ला अधिकारी लक्ष्मीप्रसाद पौडेल, प्रहरी उपरीक्षक सीताराम रिजालसहित सुरक्षा निकायका अधिकारी तथा मौलापुर नगरपालिकाकी नगर प्रमुख रिनादेवी साहलगायत जनप्रतिनिधि सम्मिलित टोलीले तटबन्ध तथा कटान प्रभावित क्षेत्रको स्थलगत निरीक्षण गरी बाढी प्रभावित क्षेत्रको जनतासँग आज छलफल गर्नुभयो ।

सो अवसरमा प्रमुख जिल्ला अधिकारी पौडेलले मर्यादपुरस्थित लालबकैया नदीको तटबन्ध भत्किएमा मौलापुर, गम्हरिया, बरगिनिया, शीतलपुर, सन्तपुर र पेटभरवासहित आसपासका बस्ती प्रभावित हुनसक्ने भनी सचेत गराउँदै प्रभावित क्षेत्रको सुरक्षा व्यवस्थासहित आवश्यक प्रबन्ध मिलाइने प्रतिबद्धता व्यक्त गर्नुभयो ।

उहाँले नेपाली सेना, सशस्त्र प्रहरी बल र नेपाल प्रहरीका टोलीलाई जोखिमयुक्त क्षेत्रमा परिचालन गरी तटबन्धको अवस्था तथा नदीको बहावबारे निरन्तर अनुगमन गर्न निर्देशन दिएको जानकारी दिँदै वर्षाको समयमा सचेत र सजग रहन प्रभावित  क्षेत्रका जनतासँग अनुरोध गर्नुभयो ।

यसैगरी, जिल्ला प्रशासन कार्यालयले फतुवा पुलनजिक भगवानपुर क्षेत्रमा रहेको तटबन्ध पनि कटानमा परेकाले त्यसबाट प्रभावित आसपासका क्षेत्रसहित सदरमुकाम गौरसम्मका जनतालाई पनि सजकता अपनाउन अनुरोध गरेको छ ।