वीरगंज । वीरगंज महानगरपालिका–२५ का वडा अध्यक्ष आशुतोष चतुर्वेदीलाई प्रहरीले नियन्त्रमा लिएकाे छ । नारायणी अस्पतालकाे घटनामा सम्बन्धमा साेधपुछकाे लागि नियन्त्रणमा लिएकाे प्रहरीले जनाएकाे छ ।

यसैबिच वडाध्यक्ष चतुर्वेदीलाई पक्राउ गरेको विरोधमा महानगरका सम्पूर्ण वडा अध्यक्षहरू एकताबद्ध भएका छन् । उनीहरूले पक्राउ परेका वडा अध्यक्षलाई तत्काल थुनामुक्त गर्न माग गर्दै रिहा नगरिए चरणबद्ध आन्दोलनमा उत्रिने चेतावनी दिएका छन् ।

मंगलबार वडाध्यक्षहरुद्वारा जारि संयुक्त वक्तव्यमा वडा अध्यक्षहरूले जननिर्वाचित प्रतिनिधिमाथि गरिएको पक्राउप्रति गम्भीर आपत्ति जनाउँदै नगरबासीको हकहित संरक्षणका लागि आफ्नो दायित्व निर्वाह गर्ने क्रममा व्यक्त गरिएको धारणालाई आधार बनाएर गरिएको धरपकडको कडा भर्त्सना गरेका छन् ।

वक्तव्यअनुसार साउन ९ गते नारायणी अस्पतालमा उपचारका क्रममा वीरगंज महानगरपालिका–२४ का राजकुमार कुर्मीको निधन भएपछि उत्पन्न परिस्थितिमा पीडित परिवारको गुनासो र चिकित्सकमाथि भएको भनिएको दुर्व्यवहारको न्यायोचित समाधानका लागि वडा अध्यक्षहरू स्थानीय प्रशासनसँग समन्वय गरिरहेका थिए । सोही क्रममा वडा अध्यक्ष चतुर्वेदीलाई महानगरपालिका कार्यालय परिसरबाट प्रहरीले पक्राउ गरेको जनाइएको छ ।

वडा अध्यक्षहरूले उक्त पक्राउलाई जनप्रतिनिधिको भूमिकामाथिको हस्तक्षेप भएको भन्दै तत्काल रिहाइको माग गरेका छन् । साथै, माग सम्बोधन नभए साउन १३ गतेदेखि क्रमबद्ध आन्दोलनका कार्यक्रम सुरु गर्न बाध्य हुने चेतावनीसमेत दिएका छन् ।

वक्तव्यमा स्थानीय प्रशासनलाई परिस्थिति थप जटिल बन्न नदिन पक्राउ परेका वडा अध्यक्ष चतुर्वेदीलाई तत्काल रिहा गरी संवाद र सहमतिका माध्यमबाट समस्या समाधान गर्न आग्रह गरिएको छ ।

वीरगंज । स्वास्थ्य तथा खाद्य स्वच्छता मन्त्रालयले नारायणी अस्पताल, वीरगंजमा उपचारका क्रममा बिरामीको निधनपछि भएको तोडफोड तथा चिकित्सक–स्वास्थ्यकर्मीमाथिको आक्रमणप्रति गम्भीर ध्यानाकर्षण भएको जनाएको छ । मन्त्रालयले घटनाप्रति दुःख व्यक्त गर्दै दोषीमाथि कानुनी कारबाही गर्न स्थानीय प्रशासनलाई निर्देशन दिएको छ ।

मन्त्रालयका सहप्रवक्ता डा. समिरकुमार अधिकारीद्वारा जारी विज्ञप्तिमा उपचारका क्रममा बिरामीको दुःखद निधनप्रति गहिरो दुःख व्यक्त गर्दै शोकसन्तप्त परिवारप्रति हार्दिक समवेदना प्रकट गरिएको छ ।

विज्ञप्तिमा बिरामीको निधनपछि अस्पतालमा भएको तोडफोड तथा उपचारमा संलग्न चिकित्सक र स्वास्थ्यकर्मीमाथि भएको आक्रमणप्रति मन्त्रालयले गम्भीर चासो व्यक्त गर्दै यस्ता हिंसात्मक घटनाप्रति सरकारको शून्य सहनशीलताको नीति रहेको पुनः दोहोर्‍याइएको छ ।

मन्त्रालयले उपचारका क्रममा स्वास्थ्यकर्मीबाट कुनै त्रुटि भएको आशंका भए त्यसको छानबिन र न्यायका लागि प्रचलित कानुनबमोजिम व्यवस्था रहेको उल्लेख गर्दै हिंसात्मक गतिविधि कुनै पनि अवस्थामा स्वीकार्य नहुने स्पष्ट पारेको छ ।

स्वास्थ्य सेवा अत्यन्त संवेदनशील क्षेत्र भएकाले सेवाग्राही र सेवा प्रदायक दुवैले यसको संवेदनशीलतालाई बुझ्न आवश्यक रहेको मन्त्रालयको भनाइ छ । चिकित्सक तथा स्वास्थ्यकर्मीले निर्भय, सुरक्षित र उच्च मनोबलका साथ निरन्तर सेवा दिन सक्ने वातावरण निर्माण गर्न मन्त्रालय प्रतिबद्ध रहेको पनि विज्ञप्तिमा उल्लेख छ ।

मन्त्रालयले आन्दोलनरत चिकित्सक तथा स्वास्थ्यकर्मीलाई सेवा सुचारु गर्न आग्रह गर्दै स्थानीय प्रशासनलाई घटनामा संलग्न दोषीको पहिचान गरी कानुनी कारबाहीको दायरामा ल्याउन निर्देशन दिएको छ । साथै सर्वसाधारणलाई पनि अस्पतालको संवेदनशीलतालाई बुझ्दै स्वास्थ्य सेवा अवरुद्ध नहुने वातावरण बनाउन सहयोग गर्न अपिल गरेको छ ।

मन्त्रालयले सबै पक्षलाई संयमित भई अस्पतालको सेवा नियमित सञ्चालनमा सहयोग गर्न समेत हार्दिक अनुरोध गरेको छ ।