वीरगन्ज । भोजपुरी भाषा, कला, साहित्य, संस्कृति तथा परम्पराको संरक्षण र प्रवर्द्धन गर्ने उद्देश्यले वीरगन्जमा ‘वीरगन्ज साहित्य महोत्सव’ आयोजना हुने भएको छ।
वीरगन्ज साहित्य महोत्सव आयोजक समितिको आयोजनामा आगामी २०८३ साल कार्तिक १८ गते वीरगन्जस्थित गहवामाई मन्दिर परिसरमा महोत्सव आयोजना गर्न लागिएको हो।
महोत्सवमा भोजपुरी भाषामा कला, कविता, गीत, नृत्य तथा वक्तृत्वकला प्रतियोगिता सञ्चालन गरिने आयोजक समितिले जनाएको छ। प्रतियोगितामार्फत विद्यालय तहका विद्यार्थी तथा युवाहरूमा लुकेर रहेको प्रतिभा उजागर गर्नुका साथै नयाँ पुस्तालाई आफ्नो मातृभाषा, मौलिक संस्कृति र परम्परासँग जोड्ने लक्ष्य राखिएको छ।
नेपालको तराई–मधेश क्षेत्रको महत्वपूर्ण सांस्कृतिक पहिचानका रूपमा रहेको भोजपुरी भाषाको साहित्यिक, सांगीतिक तथा कलात्मक पक्षलाई संरक्षण र प्रवर्द्धन गर्दै नयाँ पुस्तामाझ विस्तार गर्न महोत्सवले महत्वपूर्ण योगदान पुर्याउने आयोजकको विश्वास छ।
महोत्सवमा विभिन्न विद्यालयका विद्यार्थी, कलाकार, साहित्यकार, भाषा तथा संस्कृतिप्रेमी र स्थानीय समुदायको उल्लेख्य सहभागिता रहने अपेक्षा गरिएको छ।
महोत्सव आयोजनाका लागि राष्ट्रिय इन्फोटेक कलेज, वीरगन्ज महानगरपालिका, पटेर्वा सुगौली गाउँपालिका लगायतका संस्थाहरूले सहयोग गरेका छन्।
आयोजक समितिले भोजपुरी भाषाको आफ्नै लिपिका रूपमा रहेको कैथी लिपिको प्रवर्द्धन तथा भोजपुरी कला, साहित्य र संस्कृतिको संरक्षणमा रुचि राख्ने सम्पूर्ण भाषा, साहित्य तथा संस्कृतिप्रेमीलाई महोत्सवमा सहभागी हुन आह्वान गरेको छ।
