जनकपुरधाम । मधेश प्रदेशको वन तथा वातावरण मन्त्रालय र मातहतका निकायमा कर्मचारी सरुवामा मनोमानी तथा अपारदर्शिता भएको आरोप लगाउँदै चुरे तथा वनजंगल संरक्षण अभियानले विरोध प्रदर्शन गरेको छ ।
अभियानका पदाधिकारी तथा सदस्यहरूले सोमबार मधेश भवनको गेट अगाडि अनुहारमा कालोपट्टी बाँधेर एक घण्टा धर्ना दिएका हुन् ।
कर्मचारी सरुवामा राजनीतिक पहुँच र प्रभावका आधारमा विभेद गरिएको आरोप लगाउँदै उनीहरूले प्रदेश सरकारको ध्यानाकर्षण गराएका छन् ।
अभियानका अध्यक्ष सुनिलकुमार यादवले राजनीतिक पहुँच भएका कर्मचारीको सरुवा रोकिएको र पहुँच नभएका कर्मचारीलाई मात्रै सरुवा गरिएको आरोप लगाए । मुख्यमन्त्री तथा मन्त्रालयका अधिकारीहरूको आदेशमा केही कर्मचारीको सरुवा रोकिएको भन्दै उनले त्यसको आधार र निर्णयकर्ताबारे सरकारले स्पष्ट पार्नुपर्ने माग गरे ।
धर्नापछि अभियानले मुख्यमन्त्री तथा मन्त्रिपरिषद्को कार्यालय पुगेर प्रदेशका प्रमुख सचिवलाई सातबुँदे मागसहितको ज्ञापनपत्र बुझाएको छ ।
ज्ञापनपत्रमा सरुवा अवधि पूरा गरेका कर्मचारीको निष्पक्ष र पारदर्शी रूपमा सरुवा गर्नुपर्ने, सबै निकायमा समान सरुवा मापदण्ड लागू गर्नुपर्ने, सरुवामा भएका त्रुटि सच्याउनुपर्ने तथा कर्मचारीलाई अनिवार्य रूपमा फरक जिल्लामा पदस्थापन गर्नुपर्ने माग गरिएको छ ।
त्यस्तै, राजनीतिक संरक्षण र अपारदर्शी चलखेल बन्द गर्नुपर्ने, सरुवा रोक्नुको कारण सार्वजनिक गर्नुपर्ने तथा महिला र नवप्रवेशी कर्मचारीमाथि हुने विभेद र मानसिक दबाब अन्त्य गरी सम्मानजनक कार्यस्थल सुनिश्चित गर्नुपर्ने माग पनि गरिएको छ ।
अध्यक्ष यादवले दीपावलीअघि माग सम्बोधन गर्न प्रदेश सरकारलाई अल्टिमेटम दिएका छन् । माग पूरा नभए वन तथा वातावरण मन्त्रालय र मुख्यमन्त्री कार्यालय अगाडि थप सशक्त धर्ना दिनुका साथै प्रदेशव्यापी निर्णायक आन्दोलन गर्ने चेतावनी उनले दिएका छन् ।
