बारा । बाराको जितपुरसिमरा उपमहानगरपालिका–१६ धर्मनगरमा बाँदर धपाउने क्रममा भरुवा बन्दुक पड्काउँदा निस्किएको छर्रा लागेर एक जना घाइते भएका छन् ।
सोमबार साँझ करिब ६ः३५ बजे स्थानीय ३० वर्षीय गोविन्द ठाडा मगरले बाँदर धपाउन भरुवा बन्दुक पड्काउँदा निस्किएको छर्रा लागेर सोही ठाउँका ३२/३३ वर्षीय उत्तम रमौली मगर घाइते भएका हुन् ।
घाइते रमौलीको वीरगन्जस्थित नेपाल मेडिसिटी बयोधा अस्पताल, गण्डकमा उपचार भइरहेको प्रहरीले जनाएको छ ।
घटनाको जानकारी पाएलगत्तै जिल्ला प्रहरी कार्यालय बाराबाट प्रहरी नायब उपरीक्षक मीनबहादुर घलेको कमाण्डमा प्रहरी टोली घटनास्थल पुगेको थियो । साथै डुमरवाना अस्थायी प्रहरी पोस्ट र इलाका प्रहरी कार्यालय सिमराबाट समेत थप प्रहरी टोली खटिएको थियो ।
प्रहरीले भरुवा बन्दुक पड्काउने गोविन्द ठाडा मगरलाई दुई नाल भरुवा बन्दुकसहित नियन्त्रणमा लिएको छ ।
घटनाबारे इलाका प्रहरी कार्यालय सिमरा, बाराबाट थप अनुसन्धान भइरहेको प्रहरीले जनाएको छ ।
