वीरगंज । बाराको फेटा गाउँपालिकामा शनिबार भएको घटनामा गोली लागेर गम्भीर घाइते भएका १५ वर्षीय आदित्य पासवानलाई थप उपचारका लागि आइतबार हेलिकप्टरमार्फत काठमाडौं लगिएको छ ।
बारा क्षेत्र नम्बर ४ का प्रतिनिधिसभा सदस्य रहबर अन्सारीले काठमाडौंको महाराजगञ्जस्थित त्रिवि शिक्षण अस्पताल पुगेर आदित्यको स्वास्थ्य अवस्थाबारे जानकारी लिएका छन् । उनले आदित्यका बुबा तथा परिवारका सदस्य र उपचारमा संलग्न चिकित्सकहरूसँग भेट गरी उपचारको अवस्थाबारे विस्तृत छलफल गरेका हुन् ।
सांसद अन्सारीले वीरगंजमा आदित्यको प्रारम्भिक उपचारमा संलग्न चिकित्सक तथा स्वास्थ्यकर्मी र काठमाडौंमा उपचार गरिरहेको चिकित्सकीय टोलीप्रति आभार व्यक्त गरेका छन् । उनले आदित्य छिट्टै निको भएर घर फर्किने विश्वास व्यक्त गर्दै उनको उपचार र परिवारलाई आवश्यक सहयोगका लागि आफूहरू साथमा रहेको बताएका छन् ।
घटनालाई गम्भीरतापूर्वक लिएको उल्लेख गर्दै सांसद अन्सारीले घटनाको पृष्ठभूमिदेखि गोली चल्दासम्मका सम्पूर्ण परिस्थितिको गहिरो, निष्पक्ष र तथ्यपरक छानबिन हुनुपर्नेमा जोड दिएका छन् ।
दोषी जोसुकै भए पनि र जुनसुकै पद वा राजनीतिक संरक्षणमा रहे पनि कानुनी कारबाहीबाट उम्किन नपाउने उनको भनाइ छ ।
अन्सारीले राजनीतिक असहमतिका कारण कुनै निर्दोष नागरिकले आफ्नो रगत बगाउनुपर्ने अवस्था स्वीकार्य नहुने बताएका छन् । उनले आदित्यको शीघ्र स्वास्थ्यलाभको कामना गर्दै पीडितले न्याय पाउनुपर्ने र घाइतेको उपचार सुनिश्चित हुनुपर्नेमा जोड दिएका छन् ।
बाराको फेटा गाउँपालिकामा नवनिर्मित १५ शय्याको अस्पताल उद्घाटनको विषयलाई लिएर भएको विवादले उग्र रूप लिएपछि स्थिति तनावपूर्ण बनेको थियो । सोही क्रममा प्रहरीको गोली लागेर १५ वर्षीय आदित्य गम्भीर घाइते भएका थिए ।
