सिरहा । सिरहाको गोलबजार नगरपालिकाका तत्कालीन नगरप्रमुख देवनाथ साहु तेलीसहित सात जनाविरुद्ध भ्रष्टाचार मुद्दा दायर भएको छ। नगरपालिकाको हाटबजार ठेक्का प्रक्रियामा एक करोड ६० लाख रुपैयाँभन्दा बढी अनियमितता गरेको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दायर गरेको हो।
मुद्दा दायर गरिएका अन्य प्रतिवादीमा तत्कालीन उपप्रमुख रेशमकुमारी थारू, प्रमुख प्रशासकीय अधिकृतद्वय श्रीधर केसी र अनन्तकुमार पौड्याल, निमित्त प्रमुख प्रशासकीय अधिकृत रामनारायण महतो, राजस्व शाखा प्रमुख दिनेशकुमार सहनी र ठेकेदार वीरेन्द्रकुमार यादव रहेका छन्।
अख्तियारले तत्कालीन नगरप्रमुख तेलीसहित पाँच जनासँग जनही एक करोड ६० लाख ४६ हजार ३४४ रुपैयाँ १० पैसा बिगो मागदाबी गरेको छ। त्यस्तै, तत्कालीन प्रमुख प्रशासकीय अधिकृत अनन्तकुमार पौड्याल र निमित्त प्रमुख प्रशासकीय अधिकृत रामनारायण महतोसँग जनही एक करोड ३३ लाख ११ हजार ४३१ रुपैयाँ १० पैसा बिगो मागदाबी गरिएको छ।
नगरपालिकाको हाटबजार ठेक्का प्रक्रियामा आर्थिक अनियमितता भएको अख्तियारको आरोप छ। सोही प्रकरणमा संलग्न रहेको आरोपमा सात जनालाई प्रतिवादी बनाउँदै आयोगले विशेष अदालतमा भ्रष्टाचार मुद्दा दायर गरेको हो।
