वीरगंज । जिल्ला हुलाक कार्यालय पर्साले १५२औँ विश्व हुलाक दिवस विभिन्न कार्यक्रम आयोजना गरी मनाएको छ । ‘One Postal Network, Infinite Possibilities’ भन्ने नाराका साथ कार्यालयले सेवाग्राही सम्मानदेखि बिरामीलाई फलफूल वितरणसम्मका कार्यक्रम गरेको हो ।
विश्व हुलाक दिवसको अवसरमा जिल्ला हुलाक कार्यालय पर्साले पहिलो सेवाग्राहीलाई सम्मान गर्नुका साथै कार्यालय परिसरमा सरसफाइ कार्यक्रम सञ्चालन गरेको थियो । त्यसैगरी, वीरगंजस्थित नारायणी अस्पतालमा उपचाररत बिरामीलाई फलफूल तथा पानी वितरण गरिएको थियो । यसका साथै हुलाक दिवसकाे अवसरमा कार्यालयका कर्मचारीलाई भेष्टसमेत वितरण गरिएको जिल्ला हुलाक कार्यालय पर्साका कर्मचारी यशवन्त ठाकुरले जानकारी दिए ।
हुलाक सेवाको महत्त्वबारे जनचेतना अभिवृद्धि गर्ने, सेवाग्राहीसँगको सम्बन्ध सुदृढ बनाउने तथा सामाजिक उत्तरदायित्वअन्तर्गत सहयोग गर्ने उद्देश्यले विभिन्न कार्यक्रम आयोजना गरिएको कार्यालयले जनाएको छ ।
जिल्ला हुलाक कार्यालय पर्साका प्रमुख नमोनाथ प्रसाद यादवको अध्यक्षतामा सम्पन्न कार्यक्रममा कार्यालयका कर्मचारी सिमा न्यौपाने, यशवन्त ठाकुर, सुरेश ठगुन्ना, अजय चौधरी, कृष्ण यादव, अन्तिमा साहलगायतको सहभागिता रहेको थियो।
विश्व हुलाक दिवस हरेक वर्ष अक्टोबर ९ मा मनाइन्छ । हुलाक सेवाको महत्त्व, सञ्चार क्षेत्रमा यसको योगदान तथा नागरिकबीच सम्पर्क स्थापित गर्न हुलाक सञ्जालले निर्वाह गर्दै आएको भूमिकाबारे जानकारी गराउनु दिवसको मुख्य उद्देश्य हो ।
