वीरगंज । चाडपर्वका बेला यात्रुको चाप बढ्ने भएपछि जिल्ला प्रहरी कार्यालय पर्सा र जिल्ला ट्राफिक प्रहरी कार्यालय पर्साले वीरगंज बसपार्कमा ‘यात्रु सहायता कक्ष’ सञ्चालनमा ल्याएका छन् ।
यात्रुको यात्रा सहज, सुरक्षित र व्यवस्थित बनाउने उद्देश्यले सहायता कक्ष सञ्चालनमा ल्याइएको जिल्ला ट्राफिक प्रहरी कार्यालय पर्साका प्रमुख प्रहरी निरीक्षक दीपेन्द्र श्रेष्ठले जानकारी दिए ।
चाडपर्वका समयमा बसपार्कमा अत्यधिक भीड हुने तथा यात्रुलाई टिकट, सवारीसाधन, गन्तव्य र सुरक्षासम्बन्धी जानकारी आवश्यक पर्ने भएकाले सहायता कक्षमार्फत आवश्यक सहजीकरण गरिने प्रहरीले जनाएको छ ।
सहायता कक्षबाट यात्राका क्रममा देखिएका समस्या, गुनासा तथा आवश्यक जानकारीबारे सम्बन्धित सुरक्षा निकायसँग समन्वय गरी तत्काल सेवा उपलब्ध गराउने व्यवस्था मिलाइएको प्रहरी निरीक्षक श्रेष्ठले बताए ।
सहायता कक्ष सञ्चालन कार्यक्रममा जिल्ला प्रहरी कार्यालय पर्साका डीएसपी राजु कार्की र ट्राफिक प्रहरी प्रमुख श्रेष्ठलगायतको उपस्थिति रहेको थियो ।
चाडपर्वलाई लक्षित गर्दै प्रहरीले यात्रुको सुरक्षा, सवारीसाधन व्यवस्थापन तथा सम्भावित ठगीलगायतका गतिविधि नियन्त्रण गर्न बसपार्क क्षेत्रमा विशेष निगरानी बढाएको जनाएको छ ।
यात्रु सहायता कक्ष सञ्चालनसँगै वीरगंज बसपार्कमा हुने यात्रुको चाप व्यवस्थापन तथा यात्रुका गुनासा र समस्याको तत्काल सम्बोधनमा सहयोग पुग्ने अपेक्षा गरिएको छ ।
