वीरगंज । नेपाली कांग्रेसका नेता अशर्फी शाहले नेपाली कांग्रेसको १५औँ महाधिवेशनमा मधेश तर्फबाट केन्द्रीय सदस्य पदमा उम्मेदवारी दर्ता गराएका छन् ।
पर्साको पटेर्वासुगौली गाउँपालिका–५ निवासी शाहले लामो समयदेखि नेपाली कांग्रेसको राजनीतिमा सक्रिय रहँदै आएको पृष्ठभूमिका आधारमा केन्द्रीय सदस्य पदमा उम्मेदवारी दिएका हुन् ।
शाह २०३६ सालको जनमत संग्रहदेखि प्रजातान्त्रिक बहुदलीय व्यवस्थाका लागि सक्रिय रहँदै आएका छन् । उनी २०४२ देखि २०४८ सालसम्म नेपाल विद्यार्थी संघमा सक्रिय सदस्यका रूपमा आबद्ध थिए भने २०४६ सालको जनआन्दोलनमा समेत सहभागी भएका थिए ।
२०४८ सालदेखि नेपाली कांग्रेसका सक्रिय सदस्य रहेका शाहले २०५४ देखि २०५९ सालसम्म तरुण दलको गाउँ इकाइ समितिको अध्यक्षको जिम्मेवारी सम्हालेका थिए । २०६१ सालमा कांग्रेस (प्रजातान्त्रिक) का क्षेत्रीय कोषाध्यक्ष तथा २०६४ देखि २०६७ सालसम्म पर्सा जिल्ला कांग्रेस (प्रजातान्त्रिक) तथा नेपाली कांग्रेसको संयुक्त सचिवको जिम्मेवारीमा रहेका थिए ।
त्यसैगरी शाह नेपाली कांग्रेसको ११औँ र १३औँ महाधिवेशनका महासमिति प्रतिनिधि तथा २०७२ देखि २०७८ सालसम्म महासमिति सदस्य रहेका थिए । उनले २०६२/६३ को जनआन्दोलनमा पनि सक्रिय सहभागिता जनाएका थिए ।
शाहले २०७० देखि २०७९ सालसम्म नेपाली कांग्रेसको भ्रातृ संगठन नेपाल किसान संघ पर्साको जिल्ला अध्यक्षको जिम्मेवारीसमेत सम्हालेका थिए ।
यसअघि उनको नाम विभिन्न निर्वाचनमा उम्मेदवारका लागि पार्टीको केन्द्रीय कार्यालयमा सिफारिससमेत हुँदै आएको थियो । पछिल्लो पटक २०८२ सालको निर्वाचनमा पर्सा क्षेत्र नं. ३ बाट उम्मेदवारका लागि उनको नाम सिफारिस भएको थियो ।
१५औँ महाधिवेशनमा मधेश प्रदेशबाट केन्द्रीय सदस्य पदमा उम्मेदवारी दर्ता गराउँदै शाहले पार्टीको संगठनात्मक भूमिकालाई थप सक्रिय बनाउने उद्देश्यसहित आफूले उम्मेदवारी दिएको बताएका छन् ।
