रौतहट । रौतहटको कटहरियामा पाँच वर्षीया बालिकालाई फकाएर सुनसान स्थानमा लगेर जबर्जस्ती करणीको प्रयास गरेको आरोपमा स्कुल बसका सहचालकविरुद्ध मुद्दा दर्ता भएको छ।
कटहरिया नगरपालिका–५ का २२ वर्षीय सर्विन यादवविरुद्ध बिहीबार इलाका प्रहरी कार्यालय गरुडामा जाहेरी परेपछि प्रहरीले जबर्जस्ती करणी उद्योगसम्बन्धी मुद्दा दर्ता गरेको हो। यादवलाई रौतहट जिल्ला अदालतबाट पाँच दिनको म्याद लिएर अनुसन्धान भइरहेको इलाका प्रहरी कार्यालय गरुडाका डीएसपी शंकरप्रसाद आचार्यले जानकारी दिनुभयो।
प्रहरीका अनुसार बुधबार बिहान द ड्रीम एकेडेमीमा अध्ययनरत आफ्ना दाजुलाई टिफिन पु¥याउन विद्यालय पुगेकी बालिकालाई यादवले विद्यालय परिसरबाट बाहिर बोलाएर नजिकैको खाली छाप्रोमा लगेको आरोप छ। प्रारम्भिक अनुसन्धानका क्रममा त्यहाँ बालिकामाथि जबर्जस्ती करणीको प्रयास भएको खुलेको प्रहरीले जनाएको छ।
बालिका घटनास्थलबाट उम्किएर घर पुगेपछि आमालाई घटनाबारे जानकारी गराएकी थिइन्। त्यसपछि परिवारले विद्यालय प्रशासनलाई घटनाबारे जानकारी गराएको थियो। परिवारले घटनालाई सार्वजनिक नगर्न विद्यालय प्रशासनबाट दबाब दिइएको आरोपसमेत लगाएको छ। उक्त आरोपबारे पनि प्रहरीले अनुसन्धान गरिरहेको जनाएको छ।
घटनापछि प्रहरीले विद्यालय परिसर तथा घटनास्थलको निरीक्षण गर्नुका साथै सीसीटीभी फुटेजसमेत जाँच गरेको थियो। प्रहरीका अनुसार फुटेजमा यादवले बालिकालाई छाप्रोतर्फ लैजाँदै गरेको देखिएको छ।
बालिकाको स्वास्थ्य परीक्षण भइसकेको प्रहरीले जनाएको छ। घटनाबारे थप अनुसन्धान भइरहेको डीएसपी आचार्यले बताउनुभयो।
