वीरगंज । वीरगंज–८ पानीटंकीस्थित आशाराम अस्पतालमा कार्यरत कर्मचारीहरूले आफूहरूले काम गरेको पारिश्रमिक नपाएको गुनासो गरेका छन् । कर्मचारीहरूका अनुसार अस्पतालमा कार्यरत करिब ३० देखि ४० जनाको तलब तथा अन्य पारिश्रमिक रोकिएको छ ।
अस्पतालका इन्चार्ज रोशन महताले तलब माग गर्दा व्यवस्थापन पक्षबाट स्पष्ट जवाफ नदिइएको बताउनुभयो । उहाँका अनुसार व्यवस्थापन पक्षले “कानुनी बाटो खोज्नुहोस्, अदालत जानुहोस्, हामी पैसा दिँदैनौँ” भन्ने किसिमको जवाफ दिएको छ ।
पारिश्रमिक नपाएको विषयमा विवाद बढेपछि कर्मचारीहरू मंगलबार एकजुट भएर विरोधमा उत्रिएका थिए । आन्दोलनका क्रममा उनीहरूले केही समय अस्पतालको मुख्य ढोका बन्द गरी तालाबन्दीसमेत गरेका थिए ।
आन्दोलनरत कर्मचारीहरूले आफूहरूले काम गरेको अवधिको सम्पूर्ण तलब तथा बाँकी पारिश्रमिक उपलब्ध गराउन माग गरेका छन् । अस्पताल सञ्चालन तथा व्यवस्थापनको जिम्मेवारी अर्को पक्षलाई हस्तान्तरण गर्ने प्रक्रियाबीच आफ्नो रोजगारी र बाँकी पारिश्रमिकको विषय अन्योलमा परेको अस्पतालका अर्का कर्मचारी बुलट तिवारीले वताए ।
आफूहरूले गरेको कामको तलब तथा अन्य बाँकी रकम कसले र कसरी भुक्तानी गर्ने भन्ने विषयमा स्पष्ट व्यवस्था हुनुपर्ने कर्मचारीहरूको माग छ । अस्पतालको व्यवस्थापन वा सञ्चालनको जिम्मेवारी परिवर्तन भए पनि यसअघि काम गरेको पारिश्रमिकको दायित्वबाट सम्बन्धित पक्ष पन्छिन नहुने उनीहरूको धारणा छ ।
कर्मचारीहरूले अब पारिश्रमिक भुक्तानीको माग गर्दै जिल्ला प्रशासन कार्यालय पर्सा र श्रम कार्यालयमा निवेदन दर्ता गराउने तयारी गरेका छन् । आफूहरुकाे श्रमको पारिश्रमिक उपलब्ध गराउन सम्बन्धित निकायले पहल गर्नुपर्ने उनीहरूको माग छ ।
