वीरगंज । जनता समाजवादी पार्टी नेपाल (जसपा)को टिकटमा निर्वाचित वीरगञ्ज महानगरपालिका–१ का वडाध्यक्ष मनोज राउत कुर्मीले कार्यकाल नसकिँदै पार्टी छाडेर नेपाली कांग्रेसमा प्रवेश गरेका छन् । जसपाबाट चुनाव जितेका कुर्मीले अर्को दलको सदस्यता लिएर आफ्नै पार्टीलाई खुला चुनौती दिएका हुन्।
नेपाली कांग्रेसले सार्वजनिक गरेको क्रियाशील सदस्यसम्बन्धी विवरणमा कुर्मीको नामसमेत समावेश भएपछि उनले जसपा छाडेर कांग्रेसको क्रियाशील सदस्यता लिएको खुलेको हो। सार्वजनिक विवरणअनुसार उनको कांग्रेस क्रियाशील सदस्यता नम्बर १०३५९४ रहेको छ।
कुर्मी निर्वाचनअघि नेपाली कांग्रेसमा आबद्ध रहे पनि स्थानीय तह निर्वाचनमा जसपाबाट टिकट लिएर वीरगञ्ज–१ को वडाध्यक्षमा निर्वाचित भएका थिए। तर, आफूलाई निर्वाचित गराउने दल जसपा छाडेर पुनः कांग्रेसमा आबद्ध भएपछि उनको राजनीतिक कदमसँगै वडाध्यक्ष पदको कानुनी हैसियतमाथि समेत प्रश्न उठेको छ।
राजनीतिक दलसम्बन्धी ऐन, २०७३ को दफा ३१(१) ले कुनै दलको तर्फबाट उम्मेदवार भई निर्वाचित भएको स्थानीय तहको सदस्यले पदावधि कायम रहँदासम्म आफू निर्वाचित भएको दल त्याग गर्न नपाउने व्यवस्था गरेको छ। दफा ३१(२) मा उक्त व्यवस्थाविपरीत दल त्याग गरेमा निर्वाचित पद दल त्याग गरेको मितिदेखि स्वतः रिक्त हुने व्यवस्था छ। त्यस्तै, दफा ३२(१)(ख) ले अर्को दलको सदस्यता लिएमा दल त्याग गरेको मानिने व्यवस्था गरेको छ।
यस आधारमा कांग्रेसको क्रियाशील सदस्यता लिएको विवरण पुष्टि भएमा कुर्मीको वडाध्यक्ष पद स्वतः रिक्त हुने कानुनी अवस्था सिर्जना भएको हो वा होइन भन्ने विषय सम्बन्धित निकायबाट स्पष्ट हुनुपर्ने देखिएको छ।
कुर्मीको कांग्रेस प्रवेशले जसपामाथि समेत गम्भीर राजनीतिक प्रश्न खडा गरेको छ। जसपाको टिकटमा निर्वाचित जनप्रतिनिधिले कार्यकालकै बीचमा अर्को दलको सदस्यता लिएको विवरण सार्वजनिक हुँदासमेत पार्टीले उनीमाथि कारबाही प्रक्रिया अघि नबढाएको भन्दै प्रश्न उठ्न थालेको छ।
आफ्नै टिकटमा चुनाव जितेका वडाध्यक्षले पार्टी छाडेर अर्को दल रोज्दा समेत जसपा मौन बस्नुले पार्टीको राजनीतिक अनुशासनमाथि नै प्रश्न उठाएको छ। कुर्मीको कांग्रेस प्रवेशलाई जसपालाई दिइएको खुला राजनीतिक चुनौतीका रूपमा समेत हेरिएको छ ।
