काठमाडौँ । पूर्वप्रधानन्यायाधीश चोलेन्द्र शम्शेर जबरा पक्राउ परेका छन्। उनलाई गएराति काठमाडौँको महाराजगञ्जस्थित आफ्नै निवासबाट काठमाडौँ उपत्यका अपराध अनुसन्धान कार्यालय टेकुको प्रहरी टोलीले नियन्त्रणमा लिएको उच्च स्रोतले जनाएको छ।
जबरालाई कुन कसुर वा अनुसन्धानका क्रममा पक्राउ गरिएको हो भन्नेबारे प्रहरीले अहिलेसम्म आधिकारिक रूपमा जानकारी सार्वजनिक गरेको छैन।
तत्कालीन प्रधानन्यायाधीश रहेका बेला जबराविरुद्ध २०७८ फागुनमा सङ्घीय संसद्मा महाअभियोग प्रस्ताव दर्ता भएको थियो। महाअभियोग प्रस्ताव दर्ता भएसँगै उनी निलम्बनमा परेका थिए।
जबरामाथि मन्त्रिपरिषद्मा भागबन्डा खोजेको, न्यायपालिकामा बिचौलियालाई प्रश्रय दिएको तथा विभिन्न विवादमा मुछिएको आरोप लागेको थियो। उनको राजीनामाको माग गर्दै नेपाल बार एसोसिएसनको नेतृत्वमा कानुन व्यवसायीहरूले लामो समय आन्दोलनसमेत गरेका थिए।
वकालत पेसाबाट न्यायसेवामा प्रवेश गरेका जबरा २०५३ साल वैशाख १ गते तत्कालीन पुनरावेदन अदालतको अस्थायी न्यायाधीश नियुक्त भएका थिए। पछि विशेष अदालतको सदस्य हुँदै उनी पुनरावेदन अदालत बुटवलको कायममुकायम मुख्य न्यायाधीश बने।
२०७१ सालमा उनी सर्वोच्च अदालतको न्यायाधीश नियुक्त भएका थिए। त्यसपछि २०७५ पुस १८ गते उनी नेपालको २९औँ प्रधानन्यायाधीश बनेका थिए।
