वीरगंज । डिभिजन वन कार्यालय पर्साका प्रमुख मञ्जुर अहमदले वन संरक्षण, व्यवस्थापन तथा विकासका लागि वन कार्यालय र उपभोक्ता समूहबीच प्रभावकारी सहकार्य आवश्यक रहेको बताएका छन्।
सवैया साझेदारी वन उपभोक्ता समूहको आयोजनामा शुक्रबार आयोजित ‘फेरि भेटौँला’ कार्यक्रममा प्रमुख अतिथिका रूपमा बोल्दै अहमदले वन संरक्षण सरकारी निकायको प्रयासबाट मात्र सम्भव नहुने बताए। उनले स्थानीय उपभोक्ता तथा साझेदारी वन समूहको सक्रिय सहभागिताबाट मात्रै वन संरक्षणलाई प्रभावकारी बनाउन सकिने धारणा व्यक्त गरे।
उनले वन कार्यालयको मुख्य जिम्मेवारी वन संरक्षण, वन व्यवस्थापन, वन उत्पादन तथा वन विकास रहेको उल्लेख गर्दै वन क्षेत्रलाई हराभरा बनाउँदै वातावरणीय सन्तुलन कायम गर्न वृक्षरोपण, दिगो वन व्यवस्थापन र संरक्षणका गतिविधिलाई निरन्तरता दिनुपर्नेमा जोड दिए।
“वन संरक्षण सबैको साझा जिम्मेवारी हो। वन कार्यालय र उपभोक्ता समूहबीचको सहकार्यबाट मात्रै संरक्षणलाई प्रभावकारी बनाउन सकिन्छ,” अहमदले भने।
सवैया साझेदारी वन उपभोक्ता समूहका अध्यक्ष लखनलाल साह कानुको अध्यक्षतामा सम्पन्न कार्यक्रममा वन अधिकृत नवनीत मिश्रा विशिष्ट अतिथि तथा समूहका उपाध्यक्ष असलम आलम अतिथिका रूपमा सहभागी थिए। कार्यक्रमको सञ्चालन समूहका सदस्य–सचिव सोनम आचार्यले गरेका थिए।
कार्यक्रममा भैयाराम पटेल, जयनारायण यादव, राजीव साह सोनार, नेसार अहमद, रामअयोध्या यादव, राधिका लामा, सुरेश पटेल, सुरज कुर्मी, गीता देवी कलवारिनलगायत समूहका सदस्य तथा सब–डिभिजन वन कार्यालय सवैयाका कर्मचारीहरूको सहभागिता थियो।
कार्यक्रममा वन, जंगल तथा वातावरण संरक्षण, दिगो वन व्यवस्थापन तथा वन कार्यालय र उपभोक्ता समूहबीचको सहकार्यलाई थप प्रभावकारी बनाउने विषयमा छलफल गरिएको थियो।
पर्सामा दुई वर्ष डिभिजन वन कार्यालय प्रमुखका रूपमा कार्यरत अहमदको रौतहट जिल्ला वन कार्यालयमा सरुवा भएपछि उनको सम्मान तथा आगामी दिनमा पनि सहकार्यलाई निरन्तरता दिने उद्देश्यले कार्यक्रम आयोजना गरिएको सवैया साझेदारी वन उपभोक्ता समूहले जनाएको छ।
