वीरगंज । वीरगंज महानगरपालिका–१४ गण्डकस्थित Golden Finger Gaming Zone Pvt. Ltd. (क्यासिनो) मा प्रहरीले छापा हानेको दिन सखुवाप्रसौनी गाउँपालिकाका अध्यक्ष जसवन्त यादवसँगै जिराभवानी गाउँपालिकाका अध्यक्ष अनोज चौधरी पनि क्यासिनोभित्र जुवा खेलिरहेको देखिने भिडियो सार्वजनिक भएको छ ।
गत शनिबार राति प्रहरीले क्यासिनोमा छापा हानेर जुवा खेलेकाे आरोपमा अध्यक्ष यादवसहित ४ जना र नेपाली नागरिकलाई क्यासिनोमा प्रवेश गराई जुवा खेलाएको आराेपमा क्यासिनाे चार कर्मचारी सहित आठ जनालाई नियन्त्रणमा लिएको थियो । पक्राउ परेका यादव सहित आठै जना अहिले प्रहरी हिरासतमा छन् ।
तर, सार्वजनिक भएको भिडियोमा यादवसँगै जिराभवानी गाउँपालिका अध्यक्ष चौधरी पनि क्यासिनोभित्र जुवा खेलिरहेको देखिएपछि घटनाले थप चर्चा पाएको छ । क्यासिनो स्रोतका अनुसार प्रहरी टोली छापा मार्न पुगेपछि अध्यक्ष चौधरी क्यासिनोको रेष्ट रुममा लुकेर बसेका चर्चा चलेकाे थियाे । तर त्यसकाे केही सार्वजनिक भिडियाेमा टाेपी लगाएका व्यक्ति उनी नै प्रष्टै देखिन्छ ।
प्रहरीले क्यासिनोमा पक्राउ परेकाहरूमाथि जुवासम्बन्धी कसुरमा म्याद थप गरी अनुसन्धान गरिरहेको जनाएको छ । प्रहरीले क्यासिनोको सीसीटीभी फुटेजलगायत प्रमाणका आधारमा अनुसन्धान अघि बढाइएको बताउँदै आएको छ ।
तर, सार्वजनिक भिडियोमा देखिएका अर्का जनप्रतिनिधि अध्यक्ष चौधरीमाथि तत्काल कारबाही नभएको विषयमा भने प्रश्न उठेको छ । एउटै घटनामा क्यासिनोभित्र जुवा खेलिरहेको देखिएका व्यक्तिमध्ये एक जनप्रतिनिधि पक्राउ पर्नु र अर्का पक्राउ नपर्नुले प्रहरीको अनुसन्धान प्रक्रियामाथि समेत प्रश्न उठ्न थालेको छ ।
क्यासिनोभित्र नेपाली नागरिकको प्रवेश तथा जुवा खेल्न पूर्ण रूपमा निषेध रहेको अवस्थामा निर्वाचित जनप्रतिनिधिहरू नै क्यासिनो पुगेको देखिएपछि क्यासिनो सञ्चालकको भूमिकामाथि पनि प्रश्न उठेको छ । समाचार स्राेका अनुसार अध्यक्ष चौधरी क्यासिनोमा नियमित रूपमा आउने–जाने गरेको दाबी गरिएकाे छ । यद्यपि, यस दाबीको स्वतन्त्र पुष्टि हुन बाँकी छ ।
यस विषयमा जिराभवानी गाउँपालिका अध्यक्ष अनोज चौधरीको प्रतिक्रिया लिन पटक–पटक फोन सम्पर्क गर्दा उनकाे माेबाइल स्विच अफ रहेका कारण सम्पर्क हुन सकेन ।
त्यस्तै, प्रहरीको प्रतिक्रिया लिन जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्रबहादुर मल्लसँग सम्पर्क गर्ने प्रयास गरिए पनि फोन नउठेका कारण प्रतिक्रिया लिन सकिएन ।
यस घटनामा सार्वजनिक भिडियो, सीसीटीभी फुटेज तथा अन्य प्रमाणका आधारमा प्रहरीले अनुसन्धान अगाडि बढाइरहेको बताइएको छ । अध्यक्ष चौधरीको संलग्नता तथा उनीमाथि कारबाही हुने–नहुने विषय भने प्रहरी अनुसन्धानपछि स्पष्ट हुने देखिन्छ ।
