वीरगंज । पर्साको सखुवाप्रसौनी गाउँपालिकाका अध्यक्ष जसवन्त यादव सरकारी सवारीसाधन लिएर वीरगंजस्थित क्यासिनो पुगेको अवस्थामा पक्राउ परेका छन् ।
शनिबार राति पर्सा प्रहरीले सञ्चालन गरेको विशेष अप्रेसनका क्रममा वीरगंज महानगरपालिकाको गण्डकस्थित क्लार्क रिसोर्ट होटलमा रहेको क्यासिनोबाट गाउँपालिका अध्यक्ष यादवसहित आठ जनालाई नियन्त्रणमा लिइएको हो।
जिल्ला प्रहरी कार्यालय पर्साका प्रवक्ता प्रहरी नायब उपरीक्षक (डीएसपी) चक्रबहादुर मल्लले अध्यक्ष यादवसहित आठ जनालाई क्यासिनो परिसरबाट नियन्त्रणमा लिइएको जानकारी दिए । प्रहरीले क्यासिनोको पार्किङबाट सखुवाप्रसौनी गाउँपालिकाको नाममा रहेको ना.१ झ १६८७ नम्बरको स्कोर्पियो समेत नियन्त्रणमा लिएको उनले बताए ।
प्रहरीका अनुसार पक्राउ परेका अन्य व्यक्तिमा क्यासिनोका कर्मचारीसमेत रहेका छन् । उनीहरूको पहिचान खुलाउने तथा घटनाबारे विस्तृत अनुसन्धान भइरहेको प्रहरीले जनाएको छ ।
सरकारी जिम्मेवारीमा रहेका जनप्रतिनिधि सरकारी सवारीसाधन प्रयोग गरी क्यासिनो परिसरमा पुगेको अवस्थामा फेला परेपछि प्रहरीले घटनालाई गम्भीर रूपमा लिँदै अनुसन्धान अघि बढाएको जनाएको छ ।
नेपालको प्रचलित कानुनअनुसार नेपाली नागरिकलाई क्यासिनोमा प्रवेश तथा जुवाखेलमा सहभागिता जनाउन रोक लगाइएको छ । कानुनको जानकारी हुँदाहुँदै पनि गाउँपालिका अध्यक्ष यादव क्यासिनो पुगेको देखिएको प्रहरीको भनाइ छ ।
डीएसपी मल्लले घटनासम्बन्धी विस्तृत विवरण तथा पक्राउ परेकाहरूको पहिचानबारे प्रेस विज्ञप्तिमार्फत सार्वजनिक गरिने जानकारी दिएका छन् । घटनाबारे थप अनुसन्धान भइरहेको डिएसपी मल्लले वताए ।
