वीरगंज । हालै आएको विनाशकारी बाढीबाट प्रभावित तथा पीडित परिवारको राहत तथा उद्धारका लागि तेली कल्याण समाज पर्साले १ लाख १ हजार रुपैयाँ सहयोग गर्ने निर्णय गरेको छ ।
समाजका अध्यक्ष ध्रुव साहको अध्यक्षतामा बिहिबार बसेको बैठकले प्रधानमन्त्री दैवी प्रकोप उद्धार कोषमा १ लाख १ हजार रुपैयाँ सहयोग गर्ने निर्णय गरेको हो ।
बैठकले प्राकृतिक विपद्का बेला पीडित तथा प्रभावित नागरिकलाई सहयोग गर्नु सबैको सामाजिक दायित्व भएको भन्दै राहत तथा उद्धार कार्यमा सक्दो सहयोग गर्ने प्रतिबद्धता समेत व्यक्त गरेको छ ।
बैठकमा तेली कल्याण समाजका नगर अध्यक्ष पन्नालाल साह तेली, जिल्ला सचिव वीरेन्द्र साह, गणेशप्रसाद साह, पारस साह, प्रदीप साह, श्रीलाल साह, ताराचन्द साह, मोहन साह, राजकुमार साह, उमेश साह, बाँके बिहारी साह, उपेन्द्र साह व्यास, कासी साहजी लगायतको उपस्थिति रहेको थियो ।
समाजले विनाशकारी बाढीबाट प्रभावित नागरिकको राहत, उद्धार तथा पुनःस्थापनाका लागि आवश्यक सहयोग उपलब्ध गराउने उद्देश्यले उक्त रकम सहयोग गर्ने निर्णय गरेको जनाएको छ ।
