वीरगंज । पर्साको कालिकामाई गाउँपालिका–१, मुड्लीस्थित श्री जनता माध्यमिक विद्यालयले बाढीपीडितको राहतका लागि आर्थिक सहयोग गरेको छ।
विद्यालय व्यवस्थापन समितिका अध्यक्ष एवं कालिकामाई गाउँपालिका–१ का वडाध्यक्ष लालबाबु राउत बरै र विद्यालयका प्रधानाध्यापक जयप्रकाश कुमार चौरसियाको संयुक्त पहलमा विद्यालयका शिक्षक, कर्मचारी, विद्यार्थी तथा विद्यालय व्यवस्थापन समितिका सदस्यहरूबाट सहयोग रकम संकलन गरिएको हो।
संकलित रकममध्ये विद्यालय व्यवस्थापन समिति अध्यक्ष राउतको तर्फबाट ५ हजार १ सय रुपैयाँ सहयोग गरिएको थियो। अन्य शिक्षक, कर्मचारी, विद्यार्थी तथा विद्यालय व्यवस्थापन समितिका सदस्यहरूबाट संकलित रकमसमेत गरी जम्मा १८ हजार १ सय रुपैयाँ बाढीपीडितको राहतका लागि प्रधानमन्त्री दैवी प्रकोप राहत कोषमा जम्मा गरिएको विद्यालयले जनाएको छ।
प्रधानाध्यापक जयप्रकाश कुमार चौरसियाले प्राकृतिक विपद्को पीडामा परेका नागरिकलाई थोरै भए पनि राहत पुग्ने उद्देश्यले विद्यालय परिवारले संयुक्त रूपमा सहयोग रकम संकलन गरेको बताउनुभयो।
उहाँले विपद्को समयमा सबै व्यक्ति तथा पक्षले आ–आफ्नो ठाउँबाट सहयोगको हात अघि बढाउनुपर्नेमा जोड दिँदै विद्यालय परिवारले सामाजिक उत्तरदायित्वअन्तर्गत उक्त सहयोग गरेको जानकारी दिनुभयो।
