वीरगंज । रसुवा लगायतका जिल्लामा आएको विनाशकारी बाढीबाट प्रभावित परिवारहरूको राहत तथा सहयोगका लागि पर्साको ठोरी गाउँपालिकाले ११ लाख रुपैयाँ सहयोग गर्ने भएको छ ।
ठोरी गाउँपालिकाको गाउँ कार्यपालिकाको सोमबार बसेको बैठकले बाढीपीडितका लागि उक्त रकम सहयोग गर्ने निर्णय गरेको हो ।
गाउँपालिकाका अध्यक्ष लालबहादुर श्रेष्ठका अनुसार गाउँपालिकाका सम्पूर्ण जनप्रतिनिधिले एक महिनाको तलब तथा भत्ता बराबरको रकम उपलब्ध गराउनेछन् । त्यसैगरी गाउँपालिकाको विपद् व्यवस्थापन कोष तथा गाउँपालिकामा कार्यरत कर्मचारीहरूको सहयोगसमेत गरी कुल ११ लाख रुपैयाँ राहतका लागि उपलब्ध गराउने निर्णय गरिएको हो ।
ठोरी गाउँपालिकाले तत्काल राहतका लागि उक्त रकम सहयोग गर्नुका साथै आगामी दिनमा आवश्यक पर्ने थप सहयोगका लागि स्रोत परिचालन गर्ने तयारीसमेत गरेको जनाएको छ । आवश्यकताका आधारमा विभिन्न सङ्घसंस्था, सामाजिक अभियन्ता, सहयोग गर्न इच्छुक व्यक्ति तथा समुदायबाट समेत सहयोग संकलन गरिने गाउँपालिकाले जनाएको छ ।
गाउँपालिका अध्यक्ष श्रेष्ठले विपद्को पीडा भूगोल र स्थानीय तहको सीमाभन्दा माथिको साझा मानवीय सरोकार भएको बताए ।
उनले बाढीपीडितको दुःखमा ठोरी गाउँपालिका र सम्पूर्ण ठोरीवासीको ऐक्यबद्धता रहेको उल्लेख गर्दै उपलब्ध स्रोतसाधनले भ्याएसम्म प्रभावित परिवारलाई सहयोग गर्ने प्रतिबद्धता व्यक्त गरे ।
