काठमाडौँ । रसुवास्थित भोटेकोशी नदीमा भदौ १० गते बुधबार बिहान अचानक आएको बाढीमा परी मृत्यु हुनेको सङ्ख्या ६१६ पुगेको छ ।
नेपाल प्रहरीले शनिबार बिहान ६ बजेसम्म देशका विभिन्न जिल्लाबाट ६१६ जनाको शव फेला परेको जनाएको छ । प्रहरीका अनुसार रसुवामा १३, नुवाकोटमा ४१, धादिङमा ४५, चितवनमा २३३, गोरखामा ४८, तनहुँमा ३१, नवलपरासी पूर्वमा १५८ र नवलपरासी पश्चिममा ४७ जनाको शव फेला परेको छ ।
नेपाल प्रहरीका प्रवक्ता अविनारायण काफ्लेले पछिल्लो तथ्याङ्क सङ्कलन भइरहेको जानकारी दिनुभयो । उहाँका अनुसार बाढी प्रभावित तथा जोखिममा रहेका क्षेत्रमा खोजी तथा उद्धार कार्यलाई निरन्तरता दिइएको छ ।
प्रहरीले बाढीको जोखिममा रहेका विभिन्न जिल्लाका परिवारलाई सुरक्षित स्थानमा स्थानान्तरण गर्ने, सरोकारवाला निकाय तथा स्थानीयवासीसँग समन्वय गरी उद्धार तथा खोजी कार्य गर्ने र बाढीका कारण अवरुद्ध भएका सडक तथा बाटो खुलाउने कामसमेत गरिरहेको जनाएको छ ।
बाढीबाट प्रभावित क्षेत्रमा हराइरहेका व्यक्तिको खोजी तथा उद्धार कार्य अझै जारी रहेको प्रहरीले जनाएको छ ।
