कलैया । बाराको कलैया उपमहानगरपालिका–१४, लक्ष्मिनिया चोकमा मोटरसाइकल दुर्घटना हुँदा जनमत पार्टीका केन्द्रीय सदस्य सुजित पाण्डेको मृत्यु भएको छ । मृत्यु हुनेमा कलैया उपमहानगरपालिका–१४ बघवन निवासी ३३ वर्षीय पाण्डे रहेका छन् ।
प्रहरीका अनुसार बिहीबार राति करिब १० बजे बघवनबाट कलैयातर्फ आउँदै गरेको मधेस प्रदेश ०३–०२८ प ७१९६ नम्बरको मोटरसाइकल आफैँ अनियन्त्रित भई दुर्घटनामा परेको थियो ।
दुर्घटनामा घाइते पाण्डेलाई तत्काल उपचारका लागि प्रादेशिक अस्पताल कलैया लगिएको थियो । त्यहाँ सामान्य उपचारपछि थप उपचारका लागि वीरगंजस्थित बयोधा मेडिसिटी अस्पताल ल्याइएको थियो ।
अस्पतालमा उपचारका क्रममा चिकित्सकले राति १०ः५० बजे पाण्डेलाई मृत घोषणा गरेको जिल्ला प्रहरी कार्यालय बाराका प्रवक्ता एवं प्रहरी नायब उपरीक्षक मीनबहादुर घलेले जानकारी दिए । दुर्घटनाबारे थप अनुसन्धान भइरहेको प्रहरीले जनाएको छ ।
