वीरगंज । रसुवाको भोटेकोशी तथा ल्हेन्दे खोलामा आएको विनाशकारी बाढीबाट प्रभावित नागरिकको राहत तथा उद्धारका लागि लायन्स इन्टरनेशनल मल्टिपल डिष्ट्रिक्ट ३२५, नेपालले १ करोड रुपैयाँ राहत सहयोग गर्ने निर्णय गरेको छ ।
लायन्स क्लब अफ पोखरिया लगायत डिष्ट्रिक्ट ३२५ ‘S’ अन्तर्गतका सम्पूर्ण लायन्स क्लबहरू बाढी प्रभावितको सहयोग, समन्वय तथा मानवीय सेवामा जुटिरहेका छन् ।
यसै क्रममा एरिया नं. ३ को बैठकले एरिया नं. ३ को तर्फबाट नगद सहयोग संकलन गरी लायन्स इन्टरनेशनल डिष्ट्रिक्ट ३२५ ‘S’ मार्फत नेपाल सरकारको प्रधानमन्त्री दैवी प्रकोप राहत कोषमा जम्मा गर्ने निर्णय गरेको छ ।
यसअघि लायन्स इन्टरनेशनल डिष्ट्रिक्ट ३२५ ‘S’, नेपालले प्रधानमन्त्री दैवी प्रकोप राहत कोषमा जम्मा गर्ने प्रयोजनका लागि ६ लाख ६६ हजार ६ सय ६६ रुपैयाँको चेक मल्टिपल काउन्सिल चियरपर्सनलाई हस्तान्तरण गरिसकेको जनाइएको छ ।
बाढीबाट प्रभावित परिवारको राहत तथा उद्धारमा सहयोग पुगोस् भन्ने उद्देश्यले लायन्स क्लबहरू आ–आफ्नो ठाउँबाट सहयोग तथा समन्वयमा सक्रिय रहेको लायन्स क्लब अफ पोखरियाका अध्यक्ष नेजामुद्दीन शमानीले बताए ।
उनले विपद्को कठिन घडीमा पीडित परिवारको साथमा उभिनु, सहयोगको हात बढाउनु र आशाको भावना जगाउनु नै लायन्स सेवाको मूल भावना भएको बताए ।
शमानीले बाढी प्रभावित नागरिकको राहत तथा उद्धार अभियानमा सहयोग, समन्वय र सेवामा जुटिरहेका सम्पूर्ण लायन्स क्लब, सदस्य, पदाधिकारी तथा शुभेच्छुकप्रति आभार व्यक्त गरेका छन् ।
“विपद्मा साथ–सेवामा हातेमालो” भन्ने भावनाका साथ लायन्स क्लबहरूले मानवीय सेवाको अभियानलाई निरन्तरता दिने जनाइएको छ ।
