वीरगंज । रसुवाको भोटेकोशी नदीमा आएको विनाशकारी बाढीबाट प्रभावित नागरिकको राहत तथा उद्धारका लागि वीरगंज हेल्थ केयर अस्पतालले १० लाख रुपैयाँ सहयोग गरेको छ ।
अस्पतालका सञ्चालक डा. अबुल हैस अन्सारीले प्रधानमन्त्री दैवी प्रकोप उद्धार कोषमा जम्मा गर्ने गरी १० लाख रुपैयाँको चेक पर्सा क्षेत्र नम्बर १ का प्रतिनिधिसभा सदस्य (सांसद) हरि पन्तलाई हस्तान्तरण गरेका हुन् ।
चेक ग्रहण गर्दै सांसद पन्तले सानो सहयोगले पनि बाढीबाट प्रभावित नागरिकको राहत तथा उद्धारमा ठूलो योगदान पुग्ने बताए । उनले संकटका बेला वीरगंजले मुलुकप्रतिको आफ्नो सामाजिक दायित्व निर्वाह गर्दै सहयोगको हात अघि बढाएको बताए ।
मुलुक विपद्मा परेका बेला सबै क्षेत्रबाट आ–आफ्नो क्षमता र सामर्थ्यअनुसार सहयोग आवश्यक रहेको उनको भनाइ थियो ।
सामाजिक उत्तरदायित्वअन्तर्गत सहयोग गरिएको जनाउँदै डा. अन्सारीले बाढीबाट विभिन्न क्षेत्रमा ठूलो जनधनको क्षति हुनुका साथै सयौँ परिवार प्रभावित भएकाले राहत तथा उद्धार कार्यमा सहयोग पुगोस् भन्ने उद्देश्यले रकम प्रदान गरिएको बताए ।
उनले विपद्को कठिन परिस्थितिमा एकअर्कालाई साथ दिनु नै सच्चा नेपालीपन र मानवताको परिचय भएको बताए । “एक नेपालीको रूपमा आफ्नो देश र आफ्ना नागरिकप्रति सहयोग गर्नु हाम्रो कर्तव्य हो,” उनले भने, “विपद्को यस घडीमा सबैले आफ्नो क्षमता र सामर्थ्यअनुसार बाढी प्रभावित नागरिकलाई सहयोग गर्न आवश्यक छ ।”
डा. अन्सारीले बाढी तथा प्राकृतिक विपद्बाट प्रभावित नागरिकको राहत, उद्धार र पुनःस्थापनाका लागि सरकारसँगै निजी क्षेत्र, व्यवसायी, सामाजिक संघसंस्था तथा आम नागरिकले समेत सहयोग गर्नुपर्नेमा जोड दिए ।
वीरगंज हेल्थ केयर अस्पतालले यसअघि पनि सामाजिक उत्तरदायित्वअन्तर्गत विभिन्न सामाजिक तथा मानवीय गतिविधिमा सहयोग गर्दै आएको जनाएको छ ।
