वीरगंज । रसुवाको भोटेकोशी नदीमा आएको भीषण बाढीबाट ठूलो जनधनको क्षति भएको भन्दै नेपाली कम्युनिष्ट पार्टी पर्साले नदी तटीय क्षेत्रका नागरिकलाई उच्च सतर्कता अपनाउन आग्रह गरेको छ ।
पार्टीका पर्सा जिल्ला संयोजक जयप्रकाश थारूले बुधबार विज्ञप्ति जारी गर्दै रसुवा, नुवाकोट र धादिङका रसुवागढी, टिमुरे, स्याफ्रु, मैलुङ, बेत्रावतीलगायतका क्षेत्रमा बाढीले ठूलो मानवीय तथा भौतिक क्षति पुर्याएको जनाएका छन्।
बुधबार बिहान करिब सवा ९ बजे तिब्बततर्फबाट भोटेकोशी नदीमा आएको भीषण बाढीका कारण प्रभावित क्षेत्रका नागरिक, सुरक्षाकर्मी तथा कर्मचारीसमेत सम्पर्कविहीन भएको विज्ञप्तिमा उल्लेख छ । बाढीमा परी कतिपय घाइते भएका छन् भने ठूलो संख्यामा घर तथा पसलमा क्षति पुगेको पार्टीले जनाएको छ ।
बाढीका कारण टिमुरे बजारलगायतका क्षेत्रमा घर–पसल, पशुचौपाया, भन्सार कार्यालय, प्रहरी चौकी, टेलिकम टावर, सडक, पुल, जलविद्युत् आयोजना, विद्युत् गृह तथा सबस्टेसन र खेतबारीमा समेत क्षति पुगेको विज्ञप्तिमा उल्लेख छ ।
पार्टीले भोटेकोशी र त्रिशूली नदीमा बाढीको जोखिम अझै कायम रहेको भन्दै रसुवा, नुवाकोट, धादिङ, गोरखा र चितवनका नदी तटीय क्षेत्रमा बसोबास गर्ने नागरिकलाई विशेष सतर्कता अपनाउन आग्रह गरेको छ ।
नदी आसपासका नागरिकलाई सुरक्षित स्थानमा रहन, जोखिमपूर्ण यात्रा नगर्न तथा स्थानीय प्रशासन र सुरक्षा निकायको निर्देशन पालना गर्न संयोजक थारूले अपिल गरेका छन् ।
विपद्मा परेका नागरिकको जीवनरक्षा पहिलो दायित्व भएको भन्दै पार्टीले बाढी प्रभावित क्षेत्रमा तत्काल उद्धार तथा राहतका लागि राज्यका सम्पूर्ण विपद् व्यवस्थापन संयन्त्र, साधन–स्रोत र विकल्प परिचालन गर्न सरकारसँग माग गरेको छ ।
त्यस्तै, संघ, प्रदेश र स्थानीय सरकार, जनप्रतिनिधि, सुरक्षा निकाय, राजनीतिक दल, नागरिक समाज तथा सामाजिक संघ–संस्थाबीच समन्वय र सहकार्य गरी बाढीमा फसेकाको उद्धार, घाइतेको उपचार तथा राहत वितरणलाई प्रभावकारी बनाउन पनि पार्टीले आग्रह गरेको छ ।
‘सबै सुरक्षित रहौं, एकजुट भएर उद्धार, राहत र मानवीय सेवामा जुटौं,’ विज्ञप्तिमा भनिएको छ ।
