वीरगंज । पर्सा प्रहरीले वीरगंजबाट करिब ४ लाख १९ हजार रुपैयाँ मूल्य बराबरका अवैध औषधि बरामद गरेको छ । प्रहरीले अवैध औषधि बिक्री वितरण भइरहेको सूचनाका आधारमा वीरगंज महानगरपालिका–१६ स्थित एबी क्यारियर्सको गोदाममा छापा मारेर औषधिसहित एक जनालाई नियन्त्रणमा लिएको हो ।
जिल्ला प्रहरी कार्यालय पर्साका अनुसार आइतबार दिउँसो करिब ३ बजे विशेष सूचनाका आधारमा खटिएको प्रहरी टोलीले एबी क्यारियर्समा चेकजाँच गरेको थियो । सो क्रममा विभिन्न प्रकारका औषधि बरामद भएपछि एबी क्यारियर्सका सञ्चालक वीरगंज–१६ निवासी ४२ वर्षीय राजेश यादवलाई नियन्त्रणमा लिइएको हो ।
प्रहरीका अनुसार गोदामबाट हिम क्याम–एमपी मल्टी डोज भेट १६८ पिस, लिलिभम्याक्स भेट इन्जेक्सन ८४० पिस र हिमहिल हर्बल स्प्रे २९५ थान बरामद गरिएको छ । बरामद औषधिको अनुमानित मूल्य ४ लाख १९ हजार ४ सय १० रुपैयाँ रहेको प्रहरीले जनाएको छ ।
नियन्त्रणमा लिइएका यादवलाई बरामद औषधिसहित थप अनुसन्धानका लागि औषधि व्यवस्था विभाग, शाखा कार्यालय वीरगंज, पर्सामा पठाइएको जिल्ला प्रहरी कार्यालय पर्साका प्रवक्ता तथा सूचना अधिकारी चक्रबहादुर मल्लले जानकारी दिए ।
