वीरगंज । राष्ट्रिय स्वतन्त्र पार्टी (रास्वपा) पर्साका सभापति एवं पर्सा–१ का सांसद हरि पन्तले वीरगंजमा पर्यटकीय गतिविधि बढाउन सर्लाहीको भरततालजस्तै मानव निर्मित ताल निर्माण गर्न संस्कृति, पर्यटन तथा नागरिक उड्डयनमन्त्री गणेश पौडेलसँग आग्रह गरेका छन् ।
शनिबार वीरगंजस्थित क्लासिक ब्याङ्क्वेटमा आयोजित स्थानीय नेता तथा कार्यकर्तासँगको भेटघाट कार्यक्रममा सांसद पन्तले वीरगंजमा पर्यटनको नयाँ गन्तव्य विकास गर्न मानव निर्मित ताल निर्माणको प्रस्ताव मन्त्री पौडेलसमक्ष राखेका हुन् ।
पन्तको प्रस्ताव सम्बोधन गर्दै मन्त्री पौडेलले स्थानीय सरकारले ताल निर्माणका लागि आवश्यक जग्गा उपलब्ध गराउन सके संघीय सरकारले वीरगंजको पर्यटन प्रवर्द्धनका लागि ताल निर्माणमा बजेट विनियोजन गर्ने प्रतिबद्धता जनाए ।
मन्त्री पौडेलले नेपाल सरकारले मधेस प्रदेशमा पर्यटन प्रवर्द्धनको सम्भावना पहिचान गर्ने काम अघि बढाइरहेको बताए । मधेसका पर्यटकीय स्थलहरूको पहिचान गरी पर्यटन विकासका लागि आवश्यक योजना बनाउने काम भइरहेको उनको भनाइ थियो ।
मन्त्री पौडेलले शुक्रबार पर्सा राष्ट्रिय निकुञ्ज, गढीमाई मन्दिर र सिम्रौनगढको भ्रमण गरेका थिए । शनिबार वीरगंजमा स्थानीय नेता तथा कार्यकर्तासँग भेटघाट गर्नुका साथै वीरगंज उद्योग वाणिज्य संघमा स्थानीय उद्योगी–व्यवसायीसँग वीरगंजको पर्यटन प्रवर्द्धनका विषयमा अन्तरक्रिया गरेका छन् ।
क्लासिक ब्याङ्क्वेटमा भएको भेटघाट कार्यक्रम रास्वपा पर्साका सभापति हरि पन्तको अध्यक्षतामा सम्पन्न भएको थियो । यस्तै, वीरगंज उद्योग वाणिज्य संघमा भएको अन्तरक्रिया कार्यक्रम संघका अध्यक्ष हरि गौतमको अध्यक्षतामा सम्पन्न भएको थियो ।
कार्यक्रममा रास्वपा मधेस प्रदेशका सभापति तपेश्वर यादव, बारा जिल्लाका सांसद गणेश धिमाल, अरविन्द साह, चन्दन सिंहलगायतको उपस्थिति थियो ।
