वीरगंज । पर्साको कालिकामाई गाउँपालिका–३ का वडाध्यक्ष संजय पटेल धराैटीमा रिहा भएका छन् । अभद्र व्यवहार मुद्दामा पक्राउ परेका वडाध्यक्ष पटेल १० हजार रुपैया धराैटी बुझाएर रिहा भएका हुन् ।
प्रमुख जिल्ला अधिकारी भाेला दाहालकाे आदेशमा वडाध्यक्ष पटेल धराैटीमा रिहा भएकाे जिल्ला प्रशासन कार्यालय पर्साले जनाएकाे छ ।
मंगलबार विहान वडाध्यक्ष पटेललाई प्रहरीले उनकाे गाउँ कालिकामाई गाउँपालिका–३ हरिहरपुर विर्ताबाट नियन्त्रणमा लिएको थियाे । गाउँपालिकाका कर्मचारीमाथि कुटपिट तथा दुर्व्यवहार गरेको आरोपमा प्रहरीले उनलाई नियन्त्रणमा लिएको जिल्ला प्रहरी कार्यालय पर्साका प्रवक्ता प्रहरी नायब उपरीक्षक चक्र मल्लले पुष्टि समेत गरेका थिए ।
इलाका प्रहरी कार्यालय पोखरियाले वडाध्यक्ष पटेललाई मंगलबार विहान नियन्त्रणमा लिएर साेही दिन जिल्ला प्रशासन कार्यालयमा उपस्थित गराएकाे थियाे ।
कर्मचारी कुटपिटकाे विरोधमा कालिकामाई गाउँपालिकाका सम्पूर्ण कर्मचारीले दोषीमाथि कारवाहीको माग गर्दै आन्दोलित थिए ।
गत असार २३ गते गाउँपालिकाका कम्प्युटर अपरेटर चन्दन कुमार चौरसियामाथि गाउँ कार्यपालिकाको कार्यालयभित्रै कुटपिट तथा दुर्व्यवहार भएको थियो । कार्यालय समयमै आफ्नो जिम्मेवारी निर्वाह गरिरहेका कर्मचारीमाथि योजनाबद्ध रूपमा आक्रमण भएको भन्दै कर्मचारीहरूले दोषीमाथि कानुनी कारबाहीको माग गर्दै आन्दोलन गरिरहेका थिए ।
यसैक्रममा प्रहरीले वडाध्यक्ष पटेल सहित ३ जनामाथि अभद्र व्यवहार मुद्दा दर्ता गरेकाे हाे । जस मध्ये अन्य दुई जना अझै फरार रहेकाे प्रहरीले जनाएकाे छ ।
यसैबिच धराैटीमा रिहा भएका वडाध्यक्ष पटेल आफुलाई प्रहरीले पक्राउ नगरेकाे वताउँदै आफै जिल्ला प्रशासन कार्यालयमा वयान दिनकाे लागि उपस्थित भएकाे दाबी गरेका छन् ।
