वीरगंज । तेरापंथ युवक परिषद् वीरगंज लगातार दुई दिनमा दुई आपतकालीन रक्तदान अभियान सञ्चालन गर्दै एक नवजात शिशु र एक सुत्केरी महिलाका लागि आवश्यक रगत उपलब्ध गराएको छ ।
परिषद्का अनुसार साउन ३ गते नेशनल मेडिकल कलेजमा उपचाररत रामपति देवीका ९ दिनका शिशुका लागि बी–पोजिटिभ (B+) समूहको एक युनिट रगतको अत्यावश्यक आवश्यकता परेको थियो । जानकारी प्राप्त हुनासाथ परिषद्को ‘ब्लड अन कल’ अभियानका संयोजक आशीष चौरडियाले रक्तदातासँग समन्वय गरी आवश्यक रगतको व्यवस्था गरेका थिए ।
त्यसक्रममा रक्तदाता करण शर्मा राति करिब ११ः३० बजे ब्लड बैंक पुगेर रक्तदान गरेपछि शिशुको उपचारका लागि आवश्यक रगत उपलब्ध भएको परिषद्ले जनाएको छ ।
त्यसैगरी साउन ४ गते श्री राम अस्पतालमा उपचाररत ३० वर्षीया प्रीति यादवको सुत्केरी उपचारका क्रममा बी–पोजिटिभ (B+) समूहको एक युनिट रगत आवश्यक परेको थियो । परिषद्ले पंकज बैदको सहयोगमा पुनः ‘ब्लड अन कल’ अभियानमार्फत रक्तदाताको व्यवस्थापन गरेको थियो ।
सो क्रममा निर्मल सिंघानिया ब्लड बैंक पुगेर रक्तदान गर्दै बिरामीका लागि आवश्यक रगत उपलब्ध गराएका थिए । तेरापंथ युवक परिषद् वीरगंजले दुवै रक्तदाताप्रति आभार व्यक्त गर्दै समयमै गरिएको रक्तदानले नवजात शिशु र सुत्केरी महिलाको उपचारमा महत्वपूर्ण सहयोग पुगेको जनाएको छ ।
परिषद्ले रक्तदानलाई सबैभन्दा ठूलो मानवीय सेवा भएको उल्लेख गर्दै आवश्यक पर्दा रक्तदान गर्न इच्छुक व्यक्तिहरूलाई सदैव तयार रहन आग्रह गरेको छ।
