वीरगंज । पर्साको कालिकामाई गाउँपालिकाले कार्यालयका कम्प्युटर अपरेटरमाथि भएको कुटपिट तथा दुर्व्यवहारको घटनापछि पनि गाउँपालिकाको दैनिक सेवा प्रवाह नियमित रूपमा सञ्चालन भइरहेको जनाएको छ ।
गाउँपालिकाका प्रमुख प्रशासकीय अधिकृत केशव कुमार अधिकारीद्वारा जारी गरिएको सूचनामा कम्प्युटर अपरेटर (चौथो तह) चन्दन कुमार चौरसियामाथि असार २३ गते कार्यालय परिसरमै भएको दुर्व्यवहार, कुटपिट तथा अङ्गभङ्गको घटनाप्रति सम्पूर्ण कर्मचारी स्तब्ध रहेको उल्लेख गरिएको छ ।
सूचनामा कार्यालय समयमै आफ्नै कार्यसम्पादन गरिरहेका एक कर्मचारीमाथि योजनाबद्ध रूपमा भएको आक्रमणलाई केवल व्यक्तिगत घटना नभई सम्पूर्ण कर्मचारी समुदायमाथिको अपमान, कर्मचारी सुरक्षामाथिको चुनौती तथा सुशासनमाथिको प्रहारका रूपमा व्याख्या गरिएको छ ।
गाउँपालिकाले घटनामा संलग्न दोषीमाथि हालसम्म कानुनी कारबाही नभएको भन्दै कर्मचारीहरूमा असुरक्षाको भावना बढेको जनाएको छ । स्थानीय शान्ति सुरक्षाको जिम्मेवारी बोकेको जिल्ला प्रहरी कार्यालयबाट प्रभावकारी कानुनी प्रक्रिया अघि नबढेको उल्लेख गर्दै दोषीलाई कानुनबमोजिम शीघ्र कारबाही गर्न माग गरिएको छ ।
यद्यपि कर्मचारीहरूको नैतिक तथा कानुनी दायित्वलाई प्राथमिकतामा राख्दै गाउँपालिका अध्यक्ष बशिष्ट कुमारले भिडियो सन्देशमार्फत गाउँपालिकाको दैनिक प्रशासनिक कामकाज, विद्यालयको पठनपाठन तथा स्वास्थ्य चौकीबाट प्रदान हुने नियमित सेवा अवरुद्ध नभएको जानकारी गराएको सूचनामा उल्लेख छ ।
गाउँपालिकाले स्वास्थ्यकर्मी, शिक्षक, गाउँपालिका तथा वडा कार्यालयअन्तर्गतका सम्पूर्ण कर्मचारीलाई आ–आफ्नो जिम्मेवारीमा रही नियमित रूपमा सेवा प्रवाह गर्न अनुरोध गरेको छ ।
