वीरगंज । छपकैया तेक्वान्दो डोजाङमा शनिबार विभिन्न तहका खेलाडीहरूको बेल्ट ग्रेडिङ (स्तरोन्नति) कार्यक्रम सम्पन्न भएको छ । कार्यक्रममा १५ जना खेलाडीले विभिन्न तहका बेल्ट प्राप्त गर्दै सफलतापूर्वक स्तरोन्नति गरेका छन् ।
डोजाङका अध्यक्ष मन्सुर मोहम्मद मियाँको अध्यक्षतामा आयोजित कार्यक्रममा पर्सा जिल्ला तेक्वान्दो कार्यसमितिका अध्यक्ष गणेशमान श्रेष्ठ प्रमुख अतिथिका रूपमा सहभागी भएका थिए ।
ग्रेडिङअन्तर्गत ९ जना खेलाडीले ह्वाइट (सेतो) बेल्ट, ३ जनाले हाफ ग्रीन (हरियो) बेल्ट, १ जनाले ग्रीन बेल्ट तथा २ जनाले ब्लु बेल्ट प्राप्त गरेका छन् ।
ह्वाइट बेल्ट प्राप्त गर्नेमा सानभी क्षेत्री, दिवस सापकोटा, नित्यम चौरसिया, एम. आहिल हुसेन, कृतिक कुमार जाटिया, आयुष्मा कुमारीसहित ९ जना रहेका छन् । त्यस्तै हाफ ग्रीन बेल्टतर्फ एरिका दास, एरोन दास र विकास प्रजापति, ग्रीन बेल्टतर्फ आहिल इब्राहिम तथा ब्लु बेल्टतर्फ सबना खातुन र अमन सर्राफ ग्रेडिङमा सफल भएका छन् ।
ग्रेडिङ परीक्षा नवल किशोर शर्मा, राजेन्द्रकुमार शाही, मन्जिल मियाँ हवारी र विक्रान्त डंगोल सम्मिलित ग्रेडिङ समितिले सञ्चालन गर्दै खेलाडीहरूको सीप, अनुशासन र दक्षताको मूल्याङ्कन गरेको थियो ।
ग्रेडिङ समितिका सदस्य राजेन्द्रकुमार शाहीले नियमित प्रशिक्षण, अनुशासन र निरन्तर अभ्यास नै खेलाडीको सफलताको मुख्य आधार भएको बताए । बेल्ट ग्रेडिङ केवल पदोन्नति नभई खेलाडीको क्षमता, आत्मविश्वास र जिम्मेवारी अभिवृद्धि गर्ने प्रक्रिया भएको उल्लेख गर्दै उनले आगामी दिनमा अझ बढी मेहनतका साथ अभ्यासलाई निरन्तरता दिन खेलाडीहरूलाई आग्रह गरे ।
कार्यक्रमका अध्यक्ष मन्सुर मोहम्मद मियाँले छपकैया क्षेत्रमा तेक्वान्दोप्रति बालबालिका र युवाको आकर्षण निरन्तर बढिरहेको बताउँदै खेलमार्फत अनुशासन, आत्मरक्षा तथा सकारात्मक सोचको विकास हुने विश्वास व्यक्त गरे । उनले डोजाङले भविष्यमा पनि दक्ष खेलाडी उत्पादन र तेक्वान्दो खेलको विकासका लागि निरन्तर योगदान पुर्याउने प्रतिबद्धता जनाए ।
