वीरगंज । नेपाली कांग्रेस कालिकामाई गाउँपालिका कार्यसमितिले कालिकामाई गाउँपालिकामा कर्मचारी र जनप्रतिनिधिबीच उत्पन्न विवादका कारण पालिकाको सेवा प्रवाह प्रभावित भएको भन्दै गम्भीर ध्यानाकर्षण जनाएको छ ।
गाउँपालिका समितिका सचिव रामानन्द ठाकुर लोहारद्वारा जारी विज्ञप्तिमा गाउँपालिका अध्यक्ष र प्रमुख प्रशासकीय अधिकृतको एकलौटी तथा मनोमानी कार्यशैलीका कारण पछिल्ला वर्षहरूमा पालिकाभित्र पटक–पटक विवाद, प्रतिवाद र तनावको अवस्था सिर्जना हुँदै आएको दाबी गरिएको छ ।
विज्ञप्तिमा मिति २०८३ असार १२ गते कार्यपालिका बैठक नै नबसी शिक्षा, स्वास्थ्य तथा भूमि व्यवस्था कार्यालय स्थापनासम्बन्धी छ वटा प्रस्ताव गोप्य रूपमा निर्णय पुस्तिकामा हस्ताक्षर गराउने प्रयास भएको आरोप लगाइएको छ । उक्त विषयमा जानकारी लिन वडा नं. २, ३ र ४ का अध्यक्षसहित कार्यपालिका सदस्य तथा स्थानीय नागरिक गाउँपालिकामा पुगेका बेला केही व्यक्तिले विवाद सिर्जना गरेको कांग्रेसको दाबी छ ।
यस्तै, करिब दुई महिनाअघि सूचना माग्न पुगेका नागरिक अगुवामाथि कुटपिट भएको घटनाको पनि स्मरण गराउँदै त्यस्ता घटनाको निष्पक्ष छानबिन हुनुपर्ने माग गरिएको छ ।
कांग्रेसले संविधानले नागरिक र जनप्रतिनिधिलाई सूचना माग्ने, प्रश्न गर्ने तथा शान्तिपूर्ण रूपमा विरोध गर्ने अधिकार सुनिश्चित गरेको उल्लेख गर्दै जनप्रतिनिधि तथा नागरिकलाई षड्यन्त्रपूर्वक विभिन्न झमेलामा फसाउने कार्य स्वीकार्य नहुने जनाएको छ ।
विज्ञप्तिमार्फत पार्टीले पालिकाभित्र देखिएका विवादलाई संवाद र छलफलबाट समाधान गर्दै आम नागरिकलाई सहज रूपमा सेवा प्रवाह गर्न सम्बन्धित पक्षसँग आग्रह गरेको छ ।
गाउँपालिका कर्मचारीहरु सुरक्षा अनुभुति नभएकाे भन्दै चरणबद्ध आन्दाेलनमा छन् । कम्प्युटर अपरेटर चन्दन कुमार चौरसियामाथि कार्यालय समयमै गाउँ कार्यपालिकाको कार्यालयभित्रै कुटपिट तथा दुर्व्यवहार भएको भन्दै कर्मचारीहरू साेही दिनदेखि गाउँपालिकाकाे कामकाम ठप्प पारी दाेषीमाथि कारवाहीकाे माग गर्दै आन्दाेलित भएका छन् ।
