वीरगंज । वीरगंज महानगरपालिकाको मुख्य सडक विस्तार अभियान तीव्र गतिमा अघि बढिरहेको छ । अभियान सुरु भएको एक सातामै करिब ३ सय घर तथा संरचना हटाइएको सडक डिभिजन कार्यालय हेटौंडाले जनाएको छ ।
सडक डिभिजन हेटौंडाका इन्जिनियर तथा वीरगंजका फोकल पर्सन दुर्गा प्रसादका अनुसार गण्डकदेखि घण्टाघरसम्म तथा मितेरी पुलदेखि वीरगंज उद्योग वाणिज्य संघको भवनसम्मको क्षेत्रमा पर्ने करिब ३ सय घर तथा संरचना हटाइएको हो ।
हाल ६ वटा डोजर परिचालन गरी दैनिक ५० देखि ६० वटा घर तथा संरचना हटाउने काम भइरहेको उनले बताए । कुल ८ किलोमिटर सडक विस्तार क्षेत्रमध्ये करिब ६ किलोमिटर भागको संरचना हटाइसकिएको र बाँकी २ किलोमिटर क्षेत्रमा पनि काम निरन्तर जारी रहेको उनले जानकारी दिए ।
शनिबार श्रीराम हल, नारायणी अस्पतालदेखि विर्तासम्मका क्षेत्रमा डोजर परिचालन गरी सडकको २५/२५ मिटर दायाँ–बायाँ पर्ने घर तथा संरचना हटाउने कार्यलाई निरन्तरता दिइएको छ ।
सडक डिभिजन कार्यालयका अनुसार अब मुख्य रूपमा आदर्शनगर, महावीरस्थान, माइस्थान र घण्टाघर क्षेत्रका संरचना हटाउन बाँकी रहेको छ ।
कार्यालयले बजार क्षेत्रका केही घरधनीले आफ्ना भवनका संरचना स्वयं हटाउन थालेकाले बाँकी क्षेत्रमा सडक विस्तारको काम अझ सहज र छिटो सम्पन्न हुने अपेक्षा गरिएको जनाएको छ ।
