वीरगंज । वीरगंज महानगरपालिकाका कार्यवाहक प्रमुख ईम्तियाज आलम ले निजी विद्यालय र अभिभावकबीच उत्पन्न हुने जुनसुकै समस्याको समाधानका लागि महानगरपालिका सदैव तयार रहेको बताएका छन् ।
राष्ट्रिय निजी तथा आवासीय विद्यालय एशोसिएसन नेपाल (नेशनल प्याब्सन) नगर कार्य समिति पर्साद्वारा वीरगंजस्थित होटल भिस्वामा आयोजित ‘एसईई २०८२ एक्सीलेन्स अनर अवार्ड’ कार्यक्रममा बोल्दै उनले आर्थिक अभावका कारण महानगरभित्रका कुनै पनि विद्यार्थी शिक्षाबाट वञ्चित हुन नहुनेमा जोड दिए ।
उनले विद्यालय व्यवस्थापन र अभिभावकबीच समय–समयमा विभिन्न विषयमा विवाद उत्पन्न हुने गरेको उल्लेख गर्दै दुवै पक्षले एकअर्काको अवस्था र समस्या बुझ्न आवश्यक रहेको बताए। अभिभावकले विद्यालयको अवस्था र विद्यालयले अभिभावकको पीडालाई आत्मसात् गरे मात्र विद्यार्थी, विद्यालय र अभिभावकबीच सहकार्य बढ्ने र महानगरको शिक्षा क्षेत्र थप सुदृढ बन्ने उनको भनाइ थियो। शिक्षा क्षेत्रसँग सम्बन्धित जुनसुकै समस्या समाधान गर्न महानगरपालिका निष्पक्ष र उत्तरदायी रूपमा भूमिका निर्वाह गर्न तयार रहेको उनले स्पष्ट पारे ।
कार्यक्रममा एसईई २०८२ मा उत्कृष्ट नतिजा हासिल गरेका नेशनल प्याब्सनसँग आबद्ध २० विद्यालयका ५६ जना विद्यार्थीलाई सम्मान गरिएको थियो। पर्सा जिल्लाभर सबैभन्दा उत्कृष्ट नतिजा अर्थात् ४.० जीपीए ल्याउन सफल जि.एच.पी. विद्यालय का ६ जना तथा कादम्बरी स्कुल का २ जना विद्यार्थी र सम्बन्धित विद्यालयलाई विशेष सम्मान प्रदान गरिएको थियो। अन्य उत्कृष्ट विद्यार्थीहरूलाई पनि खादा, टीका र सम्मानपत्रद्वारा सम्मान गरिएको थियो ।
समारोहमा उपस्थित अतिथिहरूले सम्मानित विद्यार्थीहरूको सफलता कडा मेहनत, अनुशासन, अभिभावकको साथ र गुणस्तरीय शिक्षाको प्रतिफल भएको उल्लेख गर्दै आगामी दिनमा पनि यस्तै उपलब्धि हासिल गर्न शुभकामना दिएका थिए ।
कार्यक्रमका अध्यक्ष तथा नेशनल प्याब्सन नगर कार्य समिति पर्साका अध्यक्ष जियालाल गुप्ता ले विद्यार्थीहरूको उत्कृष्ट नतिजाले निजी विद्यालयप्रतिको जनविश्वास अझ मजबुत भएको बताए। उनले विद्यार्थीको सफलता विद्यालय, शिक्षक, अभिभावक र स्वयं विद्यार्थीको संयुक्त प्रयासको परिणाम भएको उल्लेख गर्दै आगामी दिनमा पनि गुणस्तरीय, व्यावहारिक तथा प्रतिस्पर्धात्मक शिक्षामा जोड दिँदै विद्यार्थीको सर्वाङ्गीण विकासका लागि निरन्तर काम गर्ने प्रतिबद्धता व्यक्त गरे। साथै, यस्ता प्रेरणादायी सम्मान कार्यक्रमलाई आगामी वर्षहरूमा पनि निरन्तरता दिइने जानकारी दिए ।
जियालाल गुप्ताको अध्यक्षतामा सम्पन्न कार्यक्रममा नेशनल प्याब्सनका संस्थापक सदस्य रामबिनय चौरसिया, सचिव सुशील भट्टराई, केन्द्रीय सदस्य अर्बिन्द सिंह, पर्सा हिसानका अध्यक्ष मुकेश गुप्ता, प्याब्सन नगर अध्यक्ष राहुल श्रीवास्तव लगायत विभिन्न विद्यालयका प्रिन्सिपल, शिक्षक, अभिभावक तथा विद्यार्थीहरूको उल्लेखनीय उपस्थिति रहेको थियो ।
