वीरगंज । नेपाली कांग्रेस पर्सा जिल्ला कार्यसमितिको आयोजनामा शनिबार वीरगंजमा ‘क्रियाशील सदस्यता सचेतना कार्यक्रम’ सम्पन्न भएको छ। पार्टी संगठनलाई थप सुदृढ बनाउने, क्रियाशील सदस्यता वितरण तथा नवीकरण प्रक्रियालाई प्रभावकारी, पारदर्शी र व्यवस्थित बनाउने उद्देश्यले कार्यक्रम आयोजना गरिएको हो ।
कार्यक्रमका प्रमुख अतिथि तथा नेपाली कांग्रेसका महामन्त्री प्रदीप पौडेल ले मधेश प्रदेशमा नेपाली कांग्रेसका सबैभन्दा बढी क्रियाशील सदस्य रहेको उल्लेख गर्दै जनजाति, दलित तथा अन्य समुदायबाट पनि थप क्रियाशील सदस्य बनाउने अभियानलाई प्राथमिकता दिनुपर्नेमा जोड दिए ।
उनले पार्टीको क्रियाशील सदस्यता प्रणाली समयमै सम्पन्न गर्नुपर्ने बताउँदै संगठन बलियो भए मात्रै कांग्रेस अझ प्रभावकारी बन्न सक्ने धारणा राखे। क्रियाशील सदस्यता पार्टीको मेरुदण्ड भएकाले सदस्यता वितरण र नवीकरण प्रक्रियामा कुनै पनि प्रकारको पक्षपात, ढिलासुस्ती वा अन्योल हुन नहुने उनको भनाइ थियो ।
महामन्त्री पौडेलले कार्यकर्ताको सक्रिय सहभागिता, अनुशासन र जनतासँगको निरन्तर सम्पर्कले मात्रै पार्टीप्रतिको विश्वास अझ मजबुत हुने उल्लेख गर्दै आगामी निर्वाचनलाई लक्षित गरी अहिलेबाटै गाउँ–टोलसम्म संगठन विस्तार र सुदृढीकरणमा जुट्न नेता–कार्यकर्तालाई आग्रह गरे ।
नेपाली कांग्रेस पर्साका सभापति जनार्दन सिंह क्षेत्री को अध्यक्षतामा सम्पन्न कार्यक्रममा केन्द्रीय सदस्यहरू रमेश रिजाल, अजयकुमार चौरसिया, सुरेन्द्र चौधरी, रामरूप प्रसाद कुर्मी, जिल्ला उपसभापति रामनारायण कुर्मी, सचिवद्वय दिनेश चौधरी र इम्तियाज आलम, क्षेत्र नं. १ का क्षेत्रीय सभापति अरविन्द गुप्ता, उपसभापति अनिल सिंह, महाधिवेशन प्रतिनिधि राकेश सिंह, महिला नेतृ किरण सरकार, मनोजा चौधरी लगायत क्रियाशील सदस्य तथा पार्टीका नेता–कार्यकर्ताको उल्लेखनीय सहभागिता रहेको थियो ।
कार्यक्रममा सहभागीहरूलाई क्रियाशील सदस्यता वितरण, नवीकरण, अभिलेखीकरण तथा संगठन विस्तारसम्बन्धी विषयमा विस्तृत जानकारी गराइएको थियो । साथै, सदस्यता व्यवस्थापनलाई थप व्यवस्थित र प्रभावकारी बनाउँदै पार्टीको संगठनलाई तल्लो तहसम्म सशक्त बनाउने विषयमा समेत छलफल गरिएको आयोजकले जनाएको छ ।
