वीरगंज । वीरगंज महानगरपालिकाका कार्यवाहक नगर प्रमुख इम्तियाज आलम र प्रमुख प्रशासकीय अधिकृत बसन्तबहादुर बोहराले शुक्रबार महानगरका विभिन्न शाखा तथा फाँटमा आकस्मिक (छड्के) अनुगमन गरेका छन्। सेवाग्राहीका गुनासोको तत्काल सम्बोधन गर्ने र कार्यालयभित्रको ढिलासुस्ती अन्त्य गर्ने उद्देश्यले संयुक्त रूपमा अनुगमन गरिएको हो ।
शुक्रबार बिहान करिब १०:३० बजे कार्यवाहक नगर प्रमुख आलम र प्रमुख प्रशासकीय अधिकृत बोहरा महानगरका विभिन्न शाखामा पुगेर कर्मचारीहरूको उपस्थितिको अवस्था निरीक्षण गरेका थिए। नेतृत्व तह आफैं कार्यालय समयको सुरुवातमै शाखा–शाखामा पुगेपछि कर्मचारी वृत्तमा हलचलसमेत देखिएको थियो ।
अनुगमनका क्रममा महानगरका विभिन्न शाखा तथा फाँटमा कार्यरत करिब २० जना कर्मचारी आफ्नो कार्यकक्षमा अनुपस्थित भेटिएका थिए।
अनुगमनपछि प्रमुख प्रशासकीय अधिकृत बसन्तबहादुर बोहराले प्रशासनिक अनुशासनमा कुनै सम्झौता नहुने स्पष्ट पार्दै अनुपस्थित कर्मचारीहरूको विवरण प्रमाणीकरण गरिने बताए ।
उनले भने, “कार्यकक्षमा नदेखिएका कर्मचारीमध्ये केही बिदामा रहेको, केही फिल्डमा गएको र केही ढिला आएको जानकारी प्राप्त भएको छ। उनीहरूले पेश गर्ने विवरणको विस्तृत प्रमाणीकरण गर्नेछौं। यदि कसैको लापरबाही वा गल्ती पुष्टि भएमा नियमानुसार आवश्यक कारबाही प्रक्रिया अघि बढाइनेछ ।”
कार्यवाहक नगर प्रमुख इम्तियाज आलमले छड्के अनुगमनको उद्देश्य कर्मचारीमाथि कारबाही गर्नु मात्र नभई सेवाप्रवाहलाई प्रभावकारी बनाउनु रहेको बताए ।
उनले भने, “महानगरमा सेवा लिन आउने सेवाग्राहीबाट पटक–पटक गुनासो आउने गरेको छ। ती गुनासोलाई गम्भीरतापूर्वक सम्बोधन गर्न र कार्यालय व्यवस्थापनलाई थप व्यवस्थित बनाउन अनुगमन गरिएको हो। साथै, पछिल्लो जेन्जी (Gen-Z) आन्दोलनपछि बदलिएको परिस्थितिमा कर्मचारीहरूले सेवा प्रवाहका क्रममा भोगिरहेका व्यवहारिक समस्या पनि प्रत्यक्ष रूपमा बुझ्ने प्रयास गरेका छौं ।”
महानगर नेतृत्वले आगामी दिनमा पनि यस्ता आकस्मिक अनुगमनलाई निरन्तरता दिँदै सेवा प्रवाहलाई छिटो, पारदर्शी र प्रभावकारी बनाइने जनाएको छ ।
