वीरगंज । रौतहटको मौलापुर नगरपालिकाका प्रमुख प्रशासकीय अधिकृत (उपसचिव) सुरेशबाबु घिमिरेमाथि काठमाडौंमै बसेर नगरपालिकाको खाताबाट करोडौं रुपैयाँ अवैध रूपमा निकालेको आरोप लागेको छ ।
लामो समयदेखि कार्यालयमा अनुपस्थित रहेका घिमिरेले नगर नेतृत्वको जानकारी र निर्णयबिनै सरकारी खाताबाट ठूलो रकम निकालेको भन्दै तत्काल छानबिन, निलम्बन र रकम फिर्ता गराउन माग गरिएको छ ।
मौलापुर नगरपालिकाकी प्रमुख रिना कुमारी साहले शुक्रबार विज्ञप्ति जारी गर्दै प्रमुख प्रशासकीय अधिकृत घिमिरेले आफ्नो जिम्मेवारी पूरा गर्नुको सट्टा सरकारी स्रोत–साधनको दुरुपयोग गर्दै आर्थिक अनियमितता गरेको आरोप लगाएकी हुन् ।
उनले महिनौँदेखि कार्यालयमा उपस्थित नभई नगरपालिकाको प्रशासनिक कामकाज अस्तव्यस्त बनाएको, सेवाप्रवाह ठप्प पारेको, विकास निर्माणका काम प्रभावित बनाएको तथा बजेटसमेत फ्रिज हुने अवस्था सिर्जना गरेको उल्लेख गरेकी छन् ।
मेयर साहले नगर नेतृत्वको जानकारी र स्वीकृतिबिना सरकारी खाताबाट करोडौं रुपैयाँ निकालिएको घटना गम्भीर आर्थिक अपराध भएको बताउँदै उक्त रकम तत्काल नगरपालिकाको खातामा फिर्ता गर्न र संलग्नमाथि कानुनी कारबाही गर्न माग गरेकी छन् ।
विज्ञप्तिमा सरकारी ढुकुटीलाई निजी सम्पत्तिजस्तो ठानी मनपरी खर्च गर्ने कार्य आर्थिक उदण्डता र भ्रष्टाचारजन्य अपराध भएको उल्लेख गर्दै यसमा संलग्न जोसुकैलाई पनि छानबिनको दायरामा ल्याउन सम्बन्धित निकायको ध्यानाकर्षण गराइएको छ ।
मेयर साहका अनुसार नगरपालिकामा लाभ हुने योजनामा मात्र भुक्तानी गर्ने र अन्य योजनाको भुक्तानी रोक्ने प्रवृत्तिले थप समस्या उत्पन्न गरेको छ । त्यसैले प्रमुख प्रशासकीय अधिकृत घिमिरेलाई तत्काल निलम्बन गरी सरकारी खाताबाट निकालिएको रकम असुलउपर गरेर नगरपालिकाको खातामा फिर्ता गराउन नेपाल सरकारसँग जोडदार माग गरिएको छ ।
उनले मौलापुर नगरपालिकामा देखिएको समस्या समाधान गर्न संघीय मन्त्रालय पटक–पटक असफल भएको उल्लेख गर्दै यसपटक भने गम्भीर भएर समस्याको निकास निकाल्न आग्रह गरेकी छन् । साथै, सर्वोच्च अदालतको अन्तरिम आदेशको भावना विपरीत हुने गरी प्रमुख प्रशासकीय अधिकृतले काम गरेको आरोपसमेत लगाएकी छन् ।
यस घटनाप्रति असन्तुष्टि जनाउँदै मौलापुरवासी आन्दोलनमा उत्रिएका छन् । बिहीबार स्थानीयले प्रधानमन्त्री वालेन शाहको पुतला दहन गर्दै प्रमुख प्रशासकीय अधिकृतमाथि छानबिन र कारबाहीको माग गरेका थिए ।
