वीरगंज । पर्सा निर्वाचन क्षेत्र नम्बर–१ का प्रतिनिधि सभा सदस्य (सांसद) हरि पन्तले गृह जिल्ला पर्साको प्रहरी प्रशासनमाथि गम्भीर प्रश्न उठाउँदै क्यासिनोमा नेपालीहरूको गैरकानुनी प्रवेश र लागूऔषध तस्करी नियन्त्रणमा प्रहरी असफल भएको आरोप लगाएका छन् ।
सोमबार प्रतिनिधिसभाको बैठकमा बोल्दै राष्ट्रिय स्वतन्त्र पार्टी (रास्वपा) का सांसद पन्तले वीरगंजका अधिकांश तारे होटलमा सञ्चालित क्यासिनोहरू भारतीय पर्यटकलाई लक्षित गरी सञ्चालन गरिए पनि प्रहरी प्रशासनकै मिलेमतोमा नेपालीहरूलाई समेत खुलेआम प्रवेश गराएर जुवा खेलाउने काम भइरहेको जनगुनासो बढ्दै गएको बताए ।
उनले क्यासिनोमा सहज पहुँचका कारण वीरगंज तथा आसपासका क्षेत्रका ठूला व्यवसायीदेखि भर्खरै व्यवसाय सुरु गरेका युवा उद्यमी, मध्यमवर्गीय परिवारका सदस्य तथा विभिन्न पेशामा आबद्ध व्यक्तिसमेत क्यासिनोको लतमा परेको दाबी गरे । यसका कारण धेरैले आफ्नो सम्पत्ति गुमाउनुका साथै व्यापार, लेनदेन, सामाजिक र पारिवारिक सम्बन्धसमेत बिग्रिएको अवस्था रहेको उनको भनाइ थियो ।
सांसद पन्तले वीरगंजस्थित क्यासिनोमा नेपालीहरूको प्रवेश पूर्ण रूपमा रोक्न तथा यसमा प्रहरी प्रशासनको संलग्नता पुष्टि भए सम्बन्धित अधिकारीमाथि कारबाही गर्न सरकारसँग माग गरे ।
त्यसैगरी उनले पछिल्लो समय वीरगञ्ज नाकाबाट भारत पुगेका मालवाहक सवारीसाधनबाट दिनहुँ क्विन्टलका दरले गाँजा र चरेस भारतीय प्रहरीले बरामद गरिरहेको घटनाले पर्सा प्रहरीको भूमिकामाथि गम्भीर प्रश्न उठाएको बताए ।
उनले भने, “सामान्य नागरिकले भारतबाट एक–दुई हजार रुपैयाँ बराबरको घरायसी सामान ल्याउँदा नाकामै प्रहरीले नियन्त्रणमा लिन्छ । तर मुख्य नाकाबाट ठूलो परिमाणमा लागूऔषध र तस्करीका सामान ओसारपसार हुँदा पनि प्रहरीले नदेखेजस्तो गर्छ ।”
केही दिनअघि रमेश लेखक स्वयं वीरगंज नाकामा पुग्दा स्थानीयले तस्करीबारे जानकारी गराएको स्मरण गराउँदै सांसद पन्तले वीरगंज नाका हुँदै भइरहेको लागूऔषध तथा अन्य वस्तुको तस्करी तत्काल रोक्न सरकारको गम्भीर ध्यानाकर्षण गराए ।
