वीरगंज । पर्सा प्रहरीले १०२ केजी ६३८ ग्राम गाँजासहित एक भारतीय नागरिकलाई पक्राउ गरेको छ । गाँजा ओसारपसारमा प्रयोग गरिएको भारतीय नम्बर प्लेटको कारसमेत प्रहरीले नियन्त्रणमा लिएको छ ।
जिल्ला प्रहरी कार्यालय पर्साका अनुसार विशेष सूचनाका आधारमा आइतबार राति करिब ११ बजे जगरनाथपुर गाउँपालिका–२ स्थित भित्री इनर्वा जाने चोकमा इलाका प्रहरी कार्यालय जानकीटोलाबाट खटिएको प्रहरी टोलीले भारततर्फ जाँदै गरेको बीआर ०१ सीयू ३५४४ नम्बरको सेतो रंगको स्पोर्ट्स कार रोकी जाँच गरेको थियो ।
खानतलासीका क्रममा कारभित्र लुकाइछिपाइ राखिएको १० वटा पोकाभित्र १०२ केजी ६३८ ग्राम गाँजा जस्तो देखिने लागूऔषध फेला परेपछि प्रहरीले कारसहित चालकलाई नियन्त्रणमा लिएको हो ।
पक्राउ पर्नेमा भारतको बिहार राज्य, बेतिया जिल्ला, नवलपुर निवासी ३२ वर्षीय गुडु बर्मा रहेका छन् ।
जिल्ला प्रहरी कार्यालय पर्साका प्रवक्ता तथा प्रहरी नायब उपरीक्षक राजु कार्कीका अनुसार बरामद गाँजा, कार तथा पक्राउ परेका व्यक्तिमाथि लागूऔषधसम्बन्धी कसुरमा थप अनुसन्धान भइरहेको छ ।
