वीरगंज । पर्साको जगरनाथपुर गाउँपालिका–३, जमुनिया गाउँको प्रवेशस्थलमा निर्माण गरिएको पक्की स्वागत प्रवेशद्वार (गेट) को सोमबार उद्घाटन गरिएको छ ।
पूर्व उद्योग, वाणिज्य तथा आपूर्ति मन्त्री तथा नेपाली कांग्रेसका केन्द्रीय सदस्य रमेश रिजालले गाउँपालिकाको आयोजनामा आयोजित एक समारोहबीच नवनिर्मित प्रवेशद्वारको उद्घाटन गरेका हुन् ।
जगरनाथपुर गाउँपालिकाको बजेटबाट २२ लाख ५० हजार रुपैयाँको लागतमा उक्त प्रवेशद्वार निर्माण गरिएकाे हाे । गाउँपालिका अध्यक्ष श्रीकान्त प्रसाद यादवको अध्यक्षता तथा पूर्वमन्त्री रिजालको प्रमुख आतिथ्यतामा उद्घाटन कार्यक्रम सम्पन्न भएको थियाे ।
कार्यक्रममा गाउँपालिकाकी उपाध्यक्ष बबिता सिंह क्षेत्री, वडाध्यक्षहरू लक्ष्मी साह तेली, नेपाली कुशवाहा, सुभाष यादव र बिहारी नुनियाका साथै स्थानीय जनप्रतिनिधि, समाजसेवी, बुद्धिजीवी तथा सर्वसाधारणको उल्लेखनीय उपस्थिति रहेको थियो ।
उद्घाटन समारोहलाई सम्बोधन गर्दै पूर्वमन्त्री रिजालले स्थानीय पूर्वाधार विकासले गाउँपालिकाको पहिचान र समृद्धिमा महत्वपूर्ण योगदान पुर्याउने बताए । उनले यस्ता संरचनाले स्थानीय पर्यटन, सांस्कृतिक पहिचान तथा विकासलाई थप टेवा पुग्ने विश्वास व्यक्त गरे ।
गाउँपालिका अध्यक्ष श्रीकान्त प्रसाद यादवले नवनिर्मित प्रवेशद्वार जगरनाथपुर गाउँपालिकाको पहिचान, धार्मिक तथा सांस्कृतिक महत्व तथा गौरवको प्रतीकका रूपमा स्थापित हुने विश्वास व्यक्त गरे । स्थानीय पूर्वाधार विकासलाई प्राथमिकतामा राख्दै गाउँपालिकाको समग्र विकास र समृद्धिका लागि आफूहरू निरन्तर क्रियाशील रहेको उनले बताए ।
