वीरगंज । पर्साको जगरनाथपुर गाउँपालिका–१, पिडारीगुठी निवासी करिब २५ वर्षीय वृजेश राम आठ दिनदेखि बेपत्ता भएपछि उनका परिवारजन चिन्तित बनेका छन् । लामो समय बितिसक्दा पनि उनको अवस्था बारे अत्तोपत्तो नलाग्दा परिवारले प्रभावकारी अनुसन्धानको माग गरेका छन् ।
परिवारका अनुसार गत सोमबार बिहान करिब ८ बजे वृजेश आफ्नी आमा मन्जु रामसँग मोटरसाइकलमा धोबिनी गाउँपालिकाको जगरनाथपुरस्थित दिदीको घरतर्फ गएका थिए । बाटोमै वर्षा सुरु भएपछि आमा–छोरा केहीबेर रोकिएका थिए । सोही क्रममा वृजेशको मोबाइलमा फोन आएपछि उनले आमालाई त्यहीँ छाडेर फाेन आएकाे व्यक्तिसंग भेट्न जाने भन्दै हिँडेका थिए । त्यसयता उनी सम्पर्कविहीन छन् ।
वृजेशका नाना रामअशिष रामका अनुसार फोन गरेर बगैँचामा बोलाइएको स्थानमा पुगेपछि आठ–नौ जनाको समूहले उनलाई एकान्तमा लगेर कुटपिट गरेको सूचना परिवारले पाएको छ । कुटपिट भइरहेका बेला वृजेशले आफ्ना भिनाजु प्रमोद रामलाई फोन गरेर आफूलाई बचाउन आग्रह गरेका थिए ।
भिनाजु प्रमोद राम घटनास्थल पुग्दा भने वृजेश त्यहाँ नरहेको र त्यसपछि उनी बेपत्ता भएको परिवारको भनाइ छ । त्यसलगत्तै आफन्त र स्थानीयले खोजी सुरु गरे पनि कुनै जानकारी नपाएपछि प्रहरीमा निवेदन दिइएको थियो ।
वृजेशका मामा वीरबल रामले आठ दिन बितिसक्दा पनि परिवारले कुनै ठोस जानकारी नपाएको भन्दै घरमा रुवाबासी चलिरहेको बताए । सामान्य आर्थिक अवस्था भएको दलित परिवारका सदस्य रहेका वृजेश बेपत्ता भएपछि गाउँभरि नै चिन्ताको वातावरण बनेको स्थानीयले बताएका छन् ।
परिवारका अनुसार वृजेशले जिराभवानी गाउँपालिकाका केही व्यक्तिबाट व्यक्तिगत कामका लागि करिब सातदेखि आठ लाख रुपैयाँसम्म कर्जा लिएका थिए । ती रकम चुक्ता गर्ने विषयमा पटक–पटक छलफलसमेत हुँदै आएको नाना रामअशिष रामले बताए ।
यता पर्सा प्रहरीले भने घटनाको विभिन्न कोणबाट अनुसन्धान भइरहेको जनाएको छ । पर्साका प्रहरी नायब उपरीक्षक राजु कार्कीले सूचना प्राप्त भएलगत्तैदेखि प्रहरीले परिवारसँग नियमित सम्पर्कमा रही घटनाको अनुसन्धानलाई तीव्र बनाएको बताए ।
आठ दिन बितिसक्दा पनि वृजेशको अत्तोपत्तो नलागेपछि परिवारले उनको सकुशल खोजीका लागि प्रहरी प्रशासनसँग प्रभावकारी पहलको माग गरेको छ ।
