वीरगंज । अत्यधिक गर्मीका कारण अस्पतालहरूमा रगतको माग बढ्दै गएको अवस्थालाई मध्यनजर गर्दै वीरगंज महानगरपालिका–३ को आयोजनामा शनिबार रक्तदान कार्यक्रम सम्पन्न भएको छ।
वडा नं. ३ कार्यालय परिसरमा आयोजित कार्यक्रममा हेल्पिङ युथ क्लब अफ वीरगंजले समन्वय गरेको थियो । कार्यक्रमकाे उद्घाटन वडा नं. ३ का वडाध्यक्ष बैजुलाल स्वर्णकारले गरेकाे थियाे ।
रक्तदान कार्यक्रममा एक महिलासहित २२ जनाले स्वेच्छिक रूपमा रक्तदान गरेका छन् । कार्यक्रममा निलु श्रेष्ठ, विशाल सरार्फ, निखिल सरार्फ, अमित सरार्फलगायतले रक्तदान गरेका थिए ।
आयोजकका अनुसार अत्यधिक गर्मीका कारण विभिन्न अस्पतालमा रगतको माग बढिरहेको र आवश्यक रगतको सहज उपलब्धता सुनिश्चित गर्ने उद्देश्यले कार्यक्रम आयोजना गरिएको हो ।
कार्यक्रममा प्रेस चौतारी पर्साका अध्यक्ष निरञ्जन मिश्र, समाजसेवी, स्थानीयवासी तथा युवाहरूको उल्लेखनीय उपस्थिति रहेको थियो ।
आयोजकले रक्तदानलाई जीवन बचाउने महान मानवीय कार्य भएको उल्लेख गर्दै सबै स्वस्थ नागरिकलाई नियमित रूपमा स्वेच्छिक रक्तदान गर्न आग्रह गरेको छ । यस्ता सामाजिक तथा मानवीय कार्यक्रमलाई आगामी दिनमा पनि निरन्तरता दिइने आयोजकले जनाएको छ ।
