वीरगंज । पर्साको पर्सागढी नगरपालिका–७ रघुनाथपुरमा विद्यार्थीहरूलाई लक्षित गरी निःशुल्क एकदिने प्राथमिक उपचार तथा सिपिआर (CPR) तालिम सम्पन्न भएको छ । रघुनाथपुरस्थित सामुदायिक भवनमा आयोजित तालिममा कक्षा १०, ११, १२ तथा स्नातक तहमा अध्ययनरत विद्यार्थीहरूको उल्लेखनीय सहभागिता रहेको थियो ।
कार्यक्रममा मुख्य प्रशिक्षकका रूपमा चिकित्सक डा. चन्द्रभूषण सिंहले आपत्कालीन अवस्थामा अपनाउनुपर्ने प्राथमिक उपचार, सिपिआरको सही विधि तथा जीवनरक्षक उपायबारे सैद्धान्तिक र प्रयोगात्मक प्रशिक्षण दिनुभएको थियो । उहाँले समयमै सही प्राथमिक उपचार गर्न सके धेरैको ज्यान बचाउन सकिने भएकाले यस्ता सीप सबै नागरिकका लागि आवश्यक रहेको बताउनुभयो ।
तालिममा अचानक हृदयघात वा श्वासप्रश्वास बन्द भएको अवस्थामा गरिने सिपिआरको अभ्यास, सर्पदंशपछि अपनाउनुपर्ने प्राथमिक उपचार तथा त्यससम्बन्धी भ्रमहरूको निराकरणका विषयमा जानकारी दिइएको थियो । साथै नेपाल सरकारद्वारा सञ्चालनमा रहेका सामाजिक सुरक्षा कोष, मातृसुरक्षा कार्यक्रम र स्वास्थ्य बीमा कार्यक्रमलगायत स्वास्थ्य सेवाबारे पनि विद्यार्थीहरूलाई सचेत गराइएको थियो ।
स्वास्थ्य सचेतना अभिवृद्धि गर्ने उद्देश्यले आयोजित कार्यक्रममा सामाजिक अभियन्ता बुद्धिराज पौडेल, कविराज अर्याल, जोखु मियाँ, विकेश राय थारु र शत्रुधन चौधरीलगायतको सहभागिता रहेको थियो । सहभागीहरूले यस्ता तालिमले विद्यार्थीहरूमा सामाजिक उत्तरदायित्वको भावना विकास हुनुका साथै विपद् तथा आपत्कालीन अवस्थामा तत्काल सहयोग गर्न सक्ने क्षमता अभिवृद्धि हुने विश्वास व्यक्त गरे ।
आयोजकका अनुसार यस्ता प्राविधिक तथा व्यावहारिक तालिमले युवाहरूमा आत्मविश्वास बढाउनुका साथै दुर्घटना वा स्वास्थ्य आपत्कालीन अवस्थाहरूमा जीवन बचाउन महत्त्वपूर्ण भूमिका खेल्नेछ ।
तालिममा सहभागी विद्यार्थीहरूले कार्यक्रमलाई उपयोगी र प्रभावकारी रहेको भन्दै आगामी दिनमा पनि यस्ता जीवनोपयोगी तालिमलाई निरन्तरता दिनुपर्ने माग गरेका छन् ।
