वीरगंज । एल.एस. न्युरो एण्ड जनरल अस्पतालले सामाजिक उत्तरदायित्व (CSR) अन्तर्गत आयोजना गरेको स्वेच्छिक रक्तदान कार्यक्रममा १७ महिलासहित कुल ५७ जनाले रक्तदान गरेका छन् ।
अस्पतालका निर्देशक डा. अर्जुन पटेलले रक्तदान गरेर कार्यक्रमको उद्घाटन गरेका थिए । कार्यक्रमकाे उद्घाटन गर्दै निर्देशक डा. पटेलले रक्तदान भन्दा ठूलाे दान कुनै दान नभएकाे वताए । उनले एक व्यक्तिकाे रक्तदानले कसैकाे जिवन बाच्न सक्ने भएकाेले मानविय नेताले याे ठूलाे दान भएकाे वताए ।
अस्पताल व्यवस्थापनले रगत अभावका कारण कुनै पनि बिरामी उपचारबाट वञ्चित हुन नपरोस् भन्ने उद्देश्यले रक्तदान कार्यक्रम आयोजना गरिएको जनाएको छ ।
रक्तदान कार्यक्रममा सहभागीहरूले रक्तदानलाई मानव जीवन बचाउने सबैभन्दा ठूलो मानवीय कार्यको संज्ञा दिँदै स्वस्थ व्यक्तिले नियमित रूपमा रक्तदान गर्नुपर्नेमा जोड दिएका थिए ।
अस्पतालका अनुसार संकलित रगत आकस्मिक शल्यक्रिया, दुर्घटनामा घाइते भएका बिरामी, सुत्केरी महिला, थालासेमिया, क्यान्सर तथा अन्य जटिल रोगका बिरामीहरूको उपचारमा उपयोग गरिनेछ । स्वेच्छिक रक्तदानको संस्कृतिलाई समाजमा विस्तार गर्न यस्ता कार्यक्रम प्रभावकारी हुने विश्वास पनि अस्पतालले व्यक्त गरेको छ ।
कार्यक्रम सफल बनाउन नेपाल रेडक्रस सोसाइटीको प्राविधिक टोली, अस्पतालका चिकित्सक, नर्स, कर्मचारी तथा स्वयंसेवकहरूले सक्रिय भूमिका निर्वाह गरेका थिए । रक्तदान गर्ने सबैलाई प्रशंसापत्र प्रदान गरिएको थियो ।
अस्पताल प्रशासनले आगामी दिनमा पनि यस्ता सामाजिक तथा मानवीय कार्यक्रमलाई निरन्तरता दिइने जनाएको छ ।
सन् २०१७ देखि सञ्चालनमा रहेको एल.एस. न्युरो एण्ड जनरल अस्पतालले उपचार सेवासँगै स्वास्थ्य सचेतना अभिवृद्धि तथा सामाजिक उत्तरदायित्वका विभिन्न कार्यक्रम सञ्चालन गर्दै आएको छ ।
