वीरगंज । कुटपिट मुद्दामा अदालतले तोकेको जरिवाना नतिरेपछि पक्राउ परेका पर्साको पकहाँ मैनपुर गाउँपालिकाका पूर्व अध्यक्ष विजय चौरसिया जरिवाना बुझाएर रिहा भएका छन् ।
वडा प्रहरी कार्यालय श्रीपुरले चौरसियालाई शुक्रबार बिहान पर्सा जिल्ला अदालत नजिकबाट नियन्त्रणमा लिएको थियो । कुटपिट मुद्दामा उच्च अदालतले तोकेको जरिवाना रकम लामो समयसम्म नतिरेका कारण अदालतको फैसला कार्यान्वयन गर्ने क्रममा उनलाई पक्राउ गरिएको वडा प्रहरी कार्यालय श्रीपुरका प्रमुख प्रहरी निरीक्षक नविन थापा मगरले जानकारी दिए ।
उनका अनुसार चौरसियाविरुद्ध कुटपिट मुद्दामा उच्च अदालत जनकपुर, अस्थायी इजलास वीरगंजले १० हजार रुपैयाँ जरिवाना गर्ने फैसला गरेको थियो । अदालतको आदेशअनुसार जरिवाना नतिरेपछि प्रहरीले उनलाई नियन्त्रणमा लिई पर्सा जिल्ला अदालतमा उपस्थित गराएको थियो ।
पछि चौरसियाका परिवारजनले अदालतमा १० हजार रुपैयाँ जरिवाना रकम बुझाएपछि उनलाई रिहा गरिएको प्रहरी निरीक्षक मगरले बताए ।
प्रहरीका अनुसार अदालतका फैसला कार्यान्वयन गर्ने अभियानअन्तर्गत फरार प्रतिवादी तथा जरिवाना नतिरेकाहरूलाई पक्राउ गर्ने कार्य निरन्तर जारी रहेको छ ।
