सेढवा । पर्साको जगरनाथपुर गाउँपालिकाको शिक्षा शाखाको आयोजनामा विद्यालयको शिक्षा व्यवस्थापन सूचना प्रणाली (EMIS) सम्बन्धी दुईदिने प्रशिक्षण कार्यक्रम सम्पन्न भएको छ ।
गाउँपालिकाकी उपाध्यक्ष बविता सिंह क्षेत्रीकको अध्यक्षतामा श्री नेपाल राष्ट्रिय माध्यमिक विद्यालय, संठीमा आयोजित कार्यक्रममा शिक्षा अधिकृत अशोक कुमार सिंह, शिक्षा शाखाको प्राबिधिक रबिन्द्र यादव, विद्यालयका प्रधानाध्यापक रामाधेश चौहानले लगायतको उपस्थिति रहेको थियो ।
कार्यक्रममा प्रशिक्षक राजाराम साहले EMIS प्रणालीमार्फत विद्यालयका शैक्षिक, आर्थिक, भौतिक तथा अन्य गतिविधिसम्बन्धी विवरण अनलाइन प्रणालीमा प्रविष्टि गर्ने, अद्यावधिक गर्ने तथा तथ्याङ्कलाई व्यवस्थित रूपमा व्यवस्थापन गर्ने विषयमा सहभागीहरूलाई प्रशिक्षण दिएका थिए ।
प्रशिक्षणमा जगरनाथपुर गाउँपालिकाभित्र रहेका २८ वटा सामुदायिक विद्यालयका प्रधानाध्यापक तथा EMIS फोकल शिक्षकहरूको सहभागिता रहेको थियो ।
प्रशिक्षक साहले विद्यालयको तथ्याङ्क समयमै र सही ढंगले EMIS प्रणालीमा अद्यावधिक गर्न सके शिक्षा क्षेत्रको योजना निर्माण, अनुगमन, मूल्याङ्कन तथा नीतिगत निर्णय प्रक्रियालाई थप प्रभावकारी बनाउन सहयोग पुग्ने बताए ।
सहभागीहरूले प्रशिक्षणबाट EMIS प्रणालीको प्रभावकारी प्रयोग, तथ्याङ्क व्यवस्थापन तथा नियमित अद्यावधिक सम्बन्धी व्यावहारिक ज्ञान हासिल भएको प्रतिक्रिया दिएका छन् ।
गाउँपालिका शिक्षा शाखाले यस्ता क्षमता अभिवृद्धिमूलक कार्यक्रमले विद्यालयको सूचना व्यवस्थापनलाई थप व्यवस्थित, पारदर्शी, प्रविधिमैत्री र तथ्यमा आधारित बनाउँदै शिक्षा प्रशासनलाई प्रभावकारी बनाउन महत्वपूर्ण योगदान पुग्ने विश्वास व्यक्त गरेको छ ।
