वीरगंज । यातायात व्यवस्था कार्यालय वीरगंजबाट पक्राउ परेका सेवाग्राही रामकुमार महतो अभद्र व्यवहार सम्बन्धी मुद्दामा धरौटीमा रिहा भएका छन् । जिल्ला प्रशासन कार्यालय पर्साले बिहीबार महतोलाई धरौटीमा छाड्न आदेश दिएको हो ।
वीरगंज महानगरपालिका–१२ निवासी २४ वर्षीय महतोलाई प्रमुख जिल्ला अधिकारी भोला दाहालको इजलासले धरौटीमा रिहा गर्न आदेश दिएको हो । जिल्ला प्रशासन कार्यालय पर्साका सूचना अधिकारी तथा सहायक प्रमुख जिल्ला अधिकारी कृष्ण थापाले महतो धरौटी बुझाएर रिहा भएको पुष्टि गरे । उनले धरौटी रकम खुलाउन नमाने पनि प्रशासन स्रोतका अनुसार महतोलाई ५ हजार रुपैयाँ धरौटी तोकिएको थियो ।
महतोलाई गत मंगलबार मोटरसाइकल नामसारी गराउन यातायात व्यवस्था कार्यालय वीरगंज पुगेका बेला वडा प्रहरी कार्यालय श्रीपुरले नियन्त्रणमा लिएको थियो । नियन्त्रणमा लिएको भोलिपल्ट उनीविरुद्ध अभद्र व्यवहार सम्बन्धी मुद्दा दर्ता गरिएको थियो ।
यातायात कार्यालय स्रोतका अनुसार महतोले आफूले खरिद गरेको गोपाल बस्नेतको नाममा रहेको मोटरसाइकल आफ्नो नाममा नामसारी गरिदिन आग्रह गरेका थिए । उनले नागरिकताको प्रतिलिपि, सवारी चालक अनुमति पत्र (लाइसेन्स) तथा नागरिक एपमा रहेका कागजातसमेत प्रस्तुत गर्दै प्रक्रिया अघि बढाइदिन अनुरोध गरेका थिए । तर फाँट प्रमुख प्रेम कार्कीले आवश्यक कागजात नपुगेको भन्दै नामसारी गर्न अस्वीकार गरेपछि विवाद उत्पन्न भएको बताइएको छ ।
स्रोतका अनुसार नामसारीका लागि महतोले जोड दिएपछि फाँट प्रमुख कार्कीले प्रहरीलाई खबर गरेका थिए । त्यसपछि उनलाई नियन्त्रणमा लिएर वडा प्रहरी कार्यालय श्रीपुर लगिएको थियो । प्रारम्भमा सहमतिमार्फत विवाद समाधान गर्ने प्रयास भए पनि सहमति हुन नसकेपछि बुधबार महतोविरुद्ध अभद्र व्यवहारको मुद्दा दर्ता गरिएको प्रहरी स्रोतले जनाएको छ ।
घटनाबारे सञ्चारमाध्यममा समाचार सार्वजनिक भएपछि प्रहरीले तीव्र रूपमा अनुसन्धान प्रक्रिया अघि बढाउँदै बिहीबार मुद्दाको फाइल जिल्ला प्रशासन कार्यालय पर्सामा पेश गरेको थियो । सोही दिन प्रमुख जिल्ला अधिकारीको इजलासले महतोलाई ५ हजार रुपैयाँ धरौटीमा रिहा गर्न आदेश दिएको हो ।
